Japonııa atom energetıkasy salasyn qaıta qarastyrady

ASTANA.KAZINFORM - Japonııa Mınıstrler kabıneti seısenbi kúni jańa negizgi energetıkalyq jospardy bekitti, dep habarlaıdy Kyodo News.

Premer-mınıstr Sıgerý Isıbanyń kabıneti parnıktik gazdar shyǵaryndylaryn 2035 jylǵa qaraı 60%-ǵa, 2040 jylǵa qaraı 73%-ǵa qysqartý maqsatyn bekitti. Alaıda bul kórsetkish Parıj kelisiminde belgilengen halyqaralyq standarttarǵa sáıkes kelmeıdi.

Jańa energetıkalyq jospar úkimettiń atom energetıkasyna qatysty burynǵy saıasatyn ózgertetinin bildiredi.

Buǵan deıin úkimet 2011 jylǵy Fýkýsımadaǵy ıadrolyq apattan keıin ıadrolyq energetıkaǵa táýeldilikti azaıtýǵa tyrysqan bolatyn. Alaıda jańa jospar endi atom energetıkasyna táýeldilikti azaıtýdy qarastyrmaıdy. Onyń ornyna ol ıadrolyq energııa jańartylatyn energııa kózderimen (JEK) birge paıdalanylatynyn kózdeıdi. Bul jańa býyn reaktorlaryn damytýdy qamtıdy, dep habarlaıdy NHK World-Japan.

-Kóp elder, sonyń ishinde AQSh dekarbonızatsııaǵa aýqymdy ınvestıtsııa salýda, - degen Japonııanyń Ekonomıka, saýda jáne ónerkásip mınıstri Edzı Mýto dekarbonızatsııaǵa kúsh salý qajettigin atap ótti.

Japonııanyń jalpy elektr energııasyn óndirýdegi atom energetıkasynyń úlesi 2040-shy shamamen 20%-dy quraıdy, bul shamamen 2030-ǵa arnalǵan 20-22% maqsatqa sáıkes jáne 2023 jylǵy kórsetkishten 8,5%-dan joǵary bolady.

Basqa sebeptermen qatar jasandy ıntellekt pen derekter ortalyqtarynyń ósýine baılanysty elektr energııasyna suranys 1,2 trıllıon kılovatt-saǵatqa deıin ósýi múmkin. Sondyqtan úkimet eski reaktorlardy jańalaryna aýystyrý talaptaryn jeńildetý arqyly joǵary suranysty qanaǵattandyrýǵa tyrysýda.

2040 jylǵa qaraı jańartylatyn energııa kózderi eldiń energetıkalyq balansynyń shamamen 40-50%-yn quraıdy dep kútilýde, bul 2023 jylǵy 22,9%-dan eki ese derlik.