Japonııa áskerı qyzmettegi áıelder úlesin arttyrmaq
ASTANA. KAZINFORM – Japonııanyń Qorǵanys mınıstrligi jastardy áskerge shaqyrýdaǵy qıyndyqtarǵa baılanysty 2030 jylǵa qaraı qarýly kúshterdegi áıelder sanyn aıtarlyqtaı arttyrý nıetin jarııalady, dep habarlaıdy The Defense Post.
Bıylǵy jyly belgilengen jańa maqsatqa sáıkes, Japonııanyń ózin-ózi qorǵaý kúshterindegi áıelderdiń úlesi 2036 jyldyń naýryz aıyna deıin qazirgi 9 paıyzdan 13 paıyzǵa jetýi tıis.
- Áskerı qyzmetshiler áıelderge arnalǵan múmkindikter keńeıe bergen saıyn mınıstrlik «ınfraqurylymdy jaqsartyp, sonyń ishinde árbir garnızon men bazada áıelderge arnalǵan dárethana, monsha jáne arnaıy oryndar, sondaı-aq kemelerde áıelderge arnalǵan bólmeler ornatyp otyr, - delingen Qorǵanys mınıstrliginiń málimdemesinde.
Japonııada týý deńgeıiniń tómendigi, halyq sanynyń azaıýy jáne eńbek naryǵyndaǵy jaǵdaıdyń shıelenisýi áskerge shaqyrýdy qıyndatyp otyr, saldarynn áskerı qyzmettegi shamamen 250 myń bos orynnyń 10 paıyzy tolmaı qalady.
Budan basqa, bul bastama jynystyq zorlyq-zombylyqqa qatysty úlken janjaldan keıin týyndady. Áskerde qyzmet etý kezinde jynystyq zorlyq-zombylyqqa ushyraǵan burynǵy sarbaz Rına Gonoı kópjyldyq sot daýynan keıin bıylǵy jyldyń qańtar aıynda úkimet jáne burynǵy áriptesimen kelisimge keldi.
Úkimet qorǵanys shyǵyndaryn arttyryp, qarýly kúshterge kóbirek talantty mamandy tartýǵa tyrysyp otyr.
- Japonııanyń ózin-ózi qorǵaý kúshterindegi áıelder sanyn kóbeıtý bizdiń mıssııalarymyzdy, mysaly, tabıǵı apattardan keıin kómek operatsııalary jáne qoǵammen tikeleı ózara árekettesýdi qamtıtyn basqa da is-sharalardy júzege asyrý tásilderimizdi keńeıtedi, - dep atap ótti Japonııanyń Qorǵanys mınıstrligi.
Alaıda, sarapshylardyń aıtýynsha, jas japondyqtardy qaýipti jumys, tómen jalaqy jáne zeınetkerlikke shyǵý jasynyń tómendigi (shamamen 56 jas) qorqytyp otyr.
NATO-ǵa múshe elder men olardyń seriktesterinde orta eseppen áıel áskerı qyzmetshilerdiń úlesi joǵary jáne Eýroparlamenttiń zertteý qyzmetiniń esebine sáıkes, olar 2022 jylǵy jaǵdaı boıynsha áskerı qyzmetshilerdiń jalpy sanynyń 12 paıyzynan astamyn qurady.
AQSh Qorǵanys mınıstrliginiń málimetinshe, 2023 jylǵy jaǵdaı boıynsha áıelder áskerge jańadan shaqyrylǵandardyń shamamen 18 paıyzyn qurady.
Osyǵan deıin Japonııa áıelderdiń ómir súrý uzaqtyǵy boıynsha taǵy rekord ornatqanyn jazdyq.
