Japonııa ártúrli aımaqtardan munaı ımporttaýǵa daıyndalmaq
ASTANA. KAZINFORM — Japonııa úkimeti eldiń munaı óńdeý zaýyttaryn Taıaý Shyǵystan basqa aımaqtardan da shıkizat qabyldaı alatyndaı etip jańǵyrtýǵa shuǵyl qoldaý kórsetpek, dep habarlaıdy Kazinform TASS agenttigine silteme jasap.
Kyodo agenttiginiń málimeti boıynsha, osy maqsatta shamamen 95 mıllıon dollar (shamamen 41,9 mıllıard teńge) josparlanǵan. Qarjylandyrý kólemi keıinirek ulǵaıýy múmkin.
Qazirgi ýaqytta Japonııada 19 munaı óńdeý zaýyty bar. Olardyń kópshiligi negizinen Taıaý Shyǵys munaıyn óńdeýge arnalǵan. Bul elderden keletin munaı Japonııa ımportynyń shamamen 90%-yn quraıtyn.
Basqa aımaqtardan munaı alý úshin jabdyqtardy jańǵyrtý qajet, sebebi shıki munaıdyń quramyndaǵy kúkirt mólsheri ártúrli bolady.
Ormýz buǵazy jabylǵannan keıin japon energetıkalyq kompanııalary basqa aımaqtardan, sonyń ishinde Soltústik Amerıka men Ońtústik Sýdannan munaı tasymaldaýǵa nazar aýdara bastady. Sonyń nátıjesinde Japonııanyń munaı ımportyndaǵy Taıaý Shyǵystyń úlesi shamamen 62%-ǵa deıin tómendedi.
Eske sala keteıik, osy aptada Saýd Arabııasy «Shyǵys — Batys» munaı qubyrynyń jumysyn qaıta bastady.
