Japonııa, AQSh jáne Ońtústik Koreıa birlesken áskerı jattyǵýlaryn bastady

ASTANA. KAZINFORM — Búgin, 13 qarashada Japonııa, AQSh jáne Ońtústik Koreıa Shyǵys Qytaı teńizinde ústimizdegi jyldyń maýsym aıynan beri «Freedom Edge» atty ekinshi áskerı jattyǵýyn bastady. Bul týraly Reuters habarlady.

Basylymnyń málimetinshe, Freedom Edge 24-2 jattyǵýlary Japonııa, AQSh jáne Ońtústik Koreıa qorǵanys mınıstrleri qol qoıǵan qaýipsizdik salasyndaǵy yntymaqtastyq týraly memorandýmǵa sáıkes ótýde.

— Memorandýmǵa qol qoıý barysynda Japonııa, AQSh jáne Ońtústik Koreıanyń qorǵanys mınıstrleri Koreı túbeginde, Úndi-Tynyq muhıty aımaǵynda jáne odan tys jerlerde beıbitshilik pen turaqtylyqqa úles qosýǵa nıetti ekendikterin bildirdi, — delingen habarlamada.

Jattyǵýlarǵa Japonııanyń «Hagýro» esmınetsi (áskerı keme túri), «Orion R-3» patrýldik ushaǵy, F-15 jáne Mitsubishi F-2 joıǵysh ushaqtary, «Boeing E-767» qatysýda. Ońtústik Koreıa tarapynan eki esmınets, sonyń ishinde «Soe Rıý Son Ren», Orion R-3 patrýldik ushaǵy jáne F-15 joıǵysh ushaǵy qatysyp jatyr. 

AQSh tarapynan ıadrolyq ushaq tasyǵysh, Djordj Vashıngton, «Higgins» esmınetsteri, «McCampbell», «Dewey», Boeing P-8 Poseidon patrýldik ushaǵy, F-15 jáne F-18 joıǵysh ushaqtary, Boeing KC-135 transport tankerleri jumyldyrylǵan.