Japonııa AES-indegi jaǵdaıǵa baılanysty Qazaqstanda qorshaǵan ortanyń tabıǵı gamma-fonyna monıtorıng júrgizilýde
ASTANA. 18 naýryz.QazAqparat - Respýblıkanyń sanıtarııalyq-epıdemıologııalyq qyzmeti qorshaǵan orta nysandarynyń radıatsııalyq qaýipsizdiginiń josparly monıtorıngin júrgizýde.
Monıtorıngti barlyq oblystardyń, Astana men Almaty qalalarynyń sanıtarııalyq-epıdemıologııalyq saraptama ortalyqtary, olardyń aýdandyq fılıaldary júzege asyrady. Monıtorıng barysynda tabıǵı gamma fondy kúndelikti ólsheý, atmosferalyq aýadan jáne jaýatyn jaýyn-shashynnan aı saıyn synama alý jáne synamalardy radıoaktıvtilikke zertteý, tamaq ónimderin radıoaktıvtilikke zertteý sharalary júrgiziledi.
Jalpy respýblıka boıynsha 2010 jyl ishinde jaýyn-shashynnyń 280 synamasy, atmosferalyq aýanyń 140 synamasy radıoaktıvtilikke zertteldi, radıatsııalyq lastaný tirkelgen joq.
Qazaqstan Respýblıkasy aýmaǵynda aǵymdaǵy jyldyń 1-16 naýryzy aralyǵyndaǵy radıatsııalyq jaǵdaı qalypty kúıde, tabıǵı gamma fonnyń joǵarylaýy, sondaı-aq atmosferalyq aýanyń jáne jaýyn-shashynnyń synamalarynda radıoaktıvtik lastaný tirkelgen joq.
Japonııadaǵy atomdyq elektr stansasynda bolǵan jaǵdaıǵa baılanysty Qazaqstan Respýblıkasy Densaýlyq saqtaý mınıstrliginiń Memlekettik sanıtarlyq-epıdemıologııalyq qadaǵalaý komıteti aýmaqtyq SES departamentterine qorshaǵan ortanyń tabıǵı gamma-fony jaǵdaıynyń monıtorıngin kúsheıtý týraly tapsyrma berdi.
Dúnıejúzilik densaýlyq saqtaý uıymynyń 2011 jylǵy 16 naýryzdaǵy derekteri boıynsha Japonııanyń AES-nan radıatsııanyń basqa elderdiń aýmaǵyna jahandyq taralýy anyqtalmaǵan.
Eldegi radıatsııalyq jaǵdaıǵa qatysty barlyq máseleler boıynsha Komıtetke myna telefonǵa: 8(7172) 74-32-76 (saıt: www.mz.gov.kz ), Komıtettiń «Sanıtarlyq-epıdemıologııalyq saraptama jáne monıtorıng ǵylymı-praktıkalyq ortalyǵy» RMQK-ne tel: 8(7272) 77-60-03 nemese oblystardyń, Astana, Almaty qalalarynyń memlekettik sanıtarııalyq-epıdemıologııalyq qadaǵalaý organdarynyń aýmaqtyq organdaryna habarlasýǵa bolady.
