Japonııa 74 eldiń týrısteri úshin kirý tártibin onlaın júıe arqyly jeńildetpek
ASTANA. KAZINFORM — Japonııa 74 eldiń týrısteri úshin elge kirý tártibin jeńildetýdi josparlap otyr. Bul týraly Kyodo aqparat agenttigi habarlady.
Japonııa úkimeti týrıstik aǵynnyń artýyna baılanysty shetel azamattaryn shekarada mindetti túrde jeke tekserý talabyn alyp tastaý múmkindigin qarastyryp jatyr. Qazirgi talap boıynsha sheteldik týrısterdiń kópshiligi elge kirgen kezde ımmıgratsııalyq qyzmetkerlerdiń aldynda jeke baqylaýdan ótýi tıis. Bılik bul rásimnen bas tartý shekaradan ótý úderisin jedeldetip, áýejaılarǵa túsetin júktemeni azaıtady dep esepteıdi.
Japonııanyń Immıgratsııalyq qyzmeti jeke tekserýdiń ornyna saıahatshylar týraly aqparatty sapar aldynda onlaın tirkeý arqyly jınaýdy josparlap otyr. Ol úshin Japonııaǵa kirýge arnalǵan elektrondy ruqsat berý júıesi — JESTA engiziledi. Jańa júıeni 2028 qarjy jylynda iske qosý kózdelgen.
Vedomstvo málimetinshe, áýejaılardaǵy kezekti azaıtý maqsatynda shekarada mindetti jeke tekserýden bas tartý álemdik tájirıbede sırek kezdesedi.
Jańa júıeni engizý úshin úkimet tıisti quqyqtyq negiz qalyptastyrýdy josparlap otyr. Osy maqsatta parlamentke ımmıgratsııalyq baqylaý týraly zańǵa ózgerister engizý jónindegi zań jobasy usynylady.
Júıe Japonııaǵa qysqa merzimge vızasyz kirýge ruqsat berilgen elderdiń azamattaryna qatysty qoldanylady. Qazirgi ýaqytta bul sanatqa 74 el men aýmaq kiredi.
Ótken jyly Japonııaǵa 42,7 mıllıon sheteldik týrıst barǵan. Bul — rekordtyq kórsetkish. Bılik 2030 jylǵa qaraı bul tsıfrdy 60 mıllıonǵa deıin jetkizýdi josparlap otyr.
JESTA júıesi boıynsha saıahatshylar saparǵa shyqpas buryn onlaın-forma toltyryp, sapar maqsatyn kórsetýi tıis. Aqparat tekserilgennen keıin ımmıgratsııalyq organdar elge kirýge ruqsat berý nemese odan bas tartý týraly sheshim qabyldaıdy. Eger bılik ókilderinde adamnyń elde ruqsat etilgen merzimnen artyq qalýy múmkin degen kúdik týyndasa, áýe kompanııalary ony reıske otyrǵyzbaýy múmkin.
Qazirdiń ózinde Japonııanyń keıbir áýejaılarynda Integrated Kiosk dep atalatyn tsıfrlyq termınaldar qoldanylyp jatyr. Bul qurylǵylar shekaralyq jáne kedendik baqylaý fýnktsııalaryn biriktiredi. Termınaldar arqyly kelip jatqan jolaýshylardyń saýsaq izderi alynyp, fotosýretteri túsiriledi.
Josparlanyp otyrǵan jańa tártipke sáıkes, eger adamnyń buryn elde bolý merzimin asyryp jiberý sııaqty zań buzýshylyqtary bolmasa, ol pasporttyq baqylaýdan avtomatty túrde ótip, Japonııaǵa kire alady. Immıgratsııalyq qyzmetkerler termınaldardyń janynda kezekshilik atqaryp, qajet bolǵan jaǵdaıda qosymsha tekserý júrgizedi.
Qazirgi ýaqytta mundaı termınaldar Narıta, Haneda, Kansaı jáne Fýkýoka áýejaılarynda jumys isteıdi. Aldaǵy ýaqytta olardy eldiń basqa da áýejaılaryna ornatý josparlanyp otyr.
Eske sala ketsek, Japonııadaǵy tastandy maımyldy kórýge keletin týrıster sany kóbeıgen.
