Japonııa 3D prıntermen eki kúnde shaǵyn úıler basyp shyǵara bastady
ASTANA. QazAqparat – Japonııada Serendix startapy 3D arqyly shaǵyn úılerdi basyp shyǵarýdy bastady. Mundaı úıdiń aýdany kishigirim pátermen birdeı, eki kúnge jetpeıtin ýaqyt ishinde jasalady jáne onyń quny qatardaǵy avtokólik baǵasymen shamalas, dep habarlaıdy QazAqparat 4pda.to basylymyna silteme jasap.
Aýmaǵy 50 sharshy metrlik úı 44,5 saǵat ishinde jasalyp, 37 myń dollarǵa satylady eken. 3D-prınterde basyp shyǵarylǵan Fujitsubo úıinde bir jatyn bólme, bir jýynatyn bólme jáne asúımen birikken ashyq qonaq bólmesi bar. Japonııa densaýlyq saqtaý standarttaryna sáıkes, mundaı úıde jalǵyz adam nemese jas jubaılar tura alady, biraq tehnıkalyq turǵyda odan da kóp adam syıady.
«40 jyl buryn óndiris protsesine robottardy paıdalanatyn ınnovatsııa paıda bolyp, avtomobıl ónerkásibinde baǵa tómendeı bastady. Biz 3D-prınterge basyp shyǵarylǵan úı – turǵynúı salasyn tolyqtaı robottandyrýdyń bastamasy dep oılaımyz», - delingen Serendix málimdemesinde.
Qazir kompanııa óz úılerin salýǵa bes prınter paıdalanady, biraq 2024 jyly taǵy 12 prınterdi qosyp, jylyna 850-ge jýyq úı salýdy josparlap otyr. Negizinen úı salýǵa bos oryndar bar shaǵyn qalalarǵa basymdyq beriledi.
