Japonııa 2020 jyly ótetin Olımpıada oıyndarynyń belgisin tanystyrdy

ASTANA. QazAqparat - Tokıoda 2020 jyly ótetin Olımpıada jáne Paralımpıada oıyndary tumarynyń resmı tanystyrylymy ótti. Sımvol retinde japondyq stıldegi anıme keıipkerleri tańdalynyp alynǵan, dep habarlaıdy The Guardian.

Japon halqynyń tańdaýyna eki myńnan astam dızaıner óz jumystaryn usynǵan. Fınalıster tizimine úsh nusqa enip, sońynda jeńimpazdar anyqtaldy.

Eń qyzyǵy, 2020 Olımpıadasynyń tumaryn tańdaýǵa búkil Japonııanyń mıllıondaǵan mektep oqýshylary qatysqan.

Ázirge tańdap alynǵan tumarlarǵa at qoıylyp aıdar taǵylmapty. Uıymdastyrýshylardyń aıtýynsha, Olımpıada oıyndarynyń sımvoly retinde aqshyl-kók tústes shaqpaqtarmen bezendirilgen anıme oıynshyqtar tańdalǵan. Ol ádildikti tý etip ustaǵan keıipkerlerdiń biri bolyp sanalatyn kórinedi. Al Paralımpıada sımvoly sakýra gúlderin eske salatyn aqshyl-qyzǵylt túspen beınelengen.

Japondyq sýretshi Rıo Tanıgýchı The Guardian  agenttigine bergen suhbatynda óz týyndylarynyń tańdalǵanyna áli senbeı júrgenin aıtypty.

Uıymdastyrýshylar olımpıadalyq  kádesyılar satýǵa úlken úmit artyp otyr. Sebebi Japonıada tumar, nemese osyǵan baılanysty basqa da dúnıeler mol paıda ákeletin tabys kózi bolyp sanalady. Mysaly Kýmamoto prefektýrasynyń beınesi bolyp tabylatyn Kýmamona qonjyǵynyń sýreti salynǵan azyq-túlik taýarlary men oıynshyqtar 2016 jyly Japonııaǵa 128 mlrd ıen (1,1 mlrd AQSh dollary) paıda ákelip, rekordtyq kórsetkishke jetken.