Japonııa 1 qazannan bastap COVID-19 boıynsha tótenshe jaǵdaı rejımin alyp tastaıdy

TOKIO. Kyodo-QazAqparat – Japonııa úkimeti seısenbi kúni Tokıo men ózge de 18 prefektýrany qamtyǵan COVID-19-ǵa baılanysty jarııalanǵan tótenshe jaǵdaıdy, sondaı-aq basqa aımaqtardaǵy kvazı-tótenshe jaǵdaıdy joıý týraly resmı sheshim qabyldady, dep habarlaıdy QazAqparat Kyodo agenttigine silteme jasap.

«Koronavırýs juqtyrýdyń jańa jaǵdaılary men aýyr belgileri bar patsıentterdiń sany kúrt tómendedi», - dedi Shýga Ókilder palatasyndaǵy komıtet otyrysynda.

Úkimet shekteýlerdi birtindep jeńildetýdi josparlap otyr, ár prefektýranyń gýbernatory qandaı vırýsqa qarsy sharalardy saqtaý kerektigin jáne qaısysyn joıý kerektigin ózderi sheshedi.

20 tamyzda búkil el boıynsha 25 876 jaǵdaı anyqtalyp, ulttyq rekord ornatylǵannan beri Japonııada ınfektsııa juqtyrýshylar sany azaıyp keledi. Dúısenbide barlyǵy 1147 jaǵdaı rastaldy, Tokıoda aýrýǵa shaldyqqandar sany naýryzdan bastap alǵash ret 200-den tómendedi.