Japondyqtar 2020 jylǵy Olımpıada oıyndarynyń ashylýynda jasandy meteorıt jańbyryn jaýdyrady
ASTANA. QazAqparat - 2020 jyly Tokıo qalasyndaǵy Olımpıada oıyndarynyń ashylý saltanaty ózgeshe bolýy múmkin. Japondyq ALE Co kompanııasy jasandy meteorıt jańbyr jaýdyrýdy usynyp otyr.
Tokıo aspanynda júzdegen túrli-tústi qulap jatqan juldyzdar paıda bolady. Sky Canvas jobasy meteorıt jańbyryn qurý tehnologııasyn plazma atylýynyń kómegimen jasap jatyr.
Jobanyń basshylary túrli- tústi «qulap jatqan juldyzdardy» alý úshin Jer orbıtasyna san túrli materıaldardan jasalǵan myńdaǵan «dóńgelekteri» bar shaǵyn spýtnıkti ushyrýdy usyndy.
Jer betinen 60-80 shaqyrym bıiktikte bólshekter órtene bastaıdy. Sonyń áserinen aspan birneshe sekýndta meteorlar alaýyna boıalady. Bul bólshekter meteorlardan jyldamdyǵy baıaý bolǵandyqtan, juldyzdy jańbyr uzaqqa sozylady.
ALE-niń baǵalaýynsha, shoýdy Tokıo jáne onyń mańyndaǵy 30 000 000 adam tamashalaı alady.
