Japondyq telearna Qazaqstan men Astana týraly baǵdarlama kórsetti
ASTANA. QazAqparat - Japondyq «NHK» teleradıokompanııasy óz kórermenderine Qazaqstan jáne «Astana EKSPO-2017» halyqaralyq kórmesi jaıynda 110 mınýttyq baǵdarlama taratty, dep habarlaıdy QazAqparat.
«Arnaıy jobanyń avtory retinde tanymal japondyq jýrnalıst Okoshı Kensýke boldy. Osy jyldyń shilde aıynda Qazaqstanǵa japondyq telearnanyń túsirilim toby kelip, elimizdiń Atyraý, Qaraǵandy, Semeı, Aqtaý, Almaty jáne basqa da oblystaryna saparmen baryp qaıtqan bolatyn. Atalmysh jobada japondyq áriptester memleketimizdiń damýy jaıynda, qazaqstandyqtardyń turmys-tirshiligin, mádenıeti men salt-dástúrin keńinen kórsetti. Japonııa jýrnalısteriniń aıtýynsha, bul Qazaqstan jaıly japondyq televızııada kórsetilgen aýqymdy baǵdarlama», - dep atap ótilgen taratylǵan málimette.
Sondaı-aq joba aıasynda baǵdarlamanyń tutastaı bir bóligi «QAZAQSTAN» Respýblıkalyq teleradıokorporatsııasynyń qyzmetine arnalǵan. Ásirese, onda Ulttyq arnadaǵy ózgerister erekshe atap ótilgen. Joba jetekshisi Okoshı Kensýke Astanaǵa ózi arnaıy kelip, shyǵarmashylyq toppen birqatar baǵdarlamalardyń túsirilimine qatysyp, Basqarma tóraǵasy Erlan Qarınnen suhbat aldy. Japondyq áriptesterdi teleradıokorporatsııanyń jumys barysy, telearnadaǵy ózgerister, biregeı formatta shyqqan jańa da ári tyń jobalar tánti etti.
Aıta keteıik, bul bastama «NHK» jáne «QAZAQSTAN» teleradıokorporatsııalary arasyndaǵy yntymaqtastyq ornatýdaǵy eń alǵashqy qadam bolmaq. Sonymen qatar, osy jyldyń qazan aıynda teleradıokorporatsııanyń delegatsııasy Japonııaǵa issaparmen barýdy josparlap otyr. Onda Basqarma tóraǵasy Erlan Qarın «NHK» teleradıokompanııasynyń prezıdenti Rıochı Ýedamen kezdesedi. Osy oraıda japondyq áriptestermen qarym-qatynasty tereńdetip, tájirıbe almasý múmkindigi qarastyrylady.
«NHK» Japon teleradıotaratý korporatsııasy japondyq jáne álemdik aqparattyq keńistikte jetekshi BAQ-tyń biri bolyp sanalady. Teleradıokorporatsııa quramynda 8 aımaqtyq ortalyq jáne el ishinde habar taratatyn 54 stansa bar. 
