Japondyq ǵalymdar 2-2,5 myń adam tasymaldaı alatyn keremet poıyz oılap tapty

«Eco Ride dep atalatyn bul tehnıka amerıkandyq attraktsıondarǵa uqsatyp jasalǵan. Kólik aınalymǵa ense eń tıimdi tehnıkalardyń birine aınalmaq»,- deıdi joba jetekshisi Ioshıro Sýda.

Tıimdi bolatyn sebebi de bar. Óıtkeni poezda qozǵaltqysh jáne taǵy biraz bólshekter joq. Sondyqtan onyń baǵasy tómen, salmaǵy jeńil. Mamandardyń esepteýinshe, Eco Ride avtobýstan qaraǵanda úsh ese, kádimgi poezdan eki ese kúshti az jumsaıdy eken.
Al, eń tıimdisi, jańa qoǵamdyq kólikke arnaıy jer satyp alyp, jol salýdyń qajeti joq. Kerekti shoıynjoldy avtokólik joldarynyń jáne jaıaý júrginshiler jolynyń ústinen-aq salýǵa bolady.

Eco Ride saǵatyna 20-30 shaqyrym jyldamdyqpen 2-2,5 myń adamdy tasymaldaı alady. Biraq, tabıǵı taza kóliktiń baǵasy da arzan emes. Ózin aıtpaǵanda, onyń bir shaqyrymdyq jolyn salý úshin 20 mıllıon AQSh dollary qajet, dep habarlaıdy BAQ.KZ.