Japondyq boksshy Golovkındi jeńýge ýáde etti

ASTANA. QazAqparat - Japon boksshysy Rıota Mýrata  (13-1, 10 KO) qazaqstandyq Gennadıı Golovkındi (37-0-1, 33 KO) jekpe-jekke shaqyrdy, dep habarlaıdy «QazAqparat» HAA  boxingscene.com saıtyna silteme jasap.

Jeksenbi kúni Rıota Mýrata Hassan N'Dam N'Jıkamdy (36-3, 21 KO) tehnıkalyq nokaýtqa jiberip,  WBA tujyrymy boıynsha orta salmaqtaǵy «turaqty» álem chempıony belbeýin ıelendi.

Jyldyń basynda 2012 jylǵy Olımpıada chempıony upaı boıynsha frantsýzǵa ese jibergen edi. Boksshylardyń revanshy Tokıoda ótti. N'Dam jetinshi raýndtan keıin kezdesýdi jalǵastyrýdan bas tartyp, tıtýlynan aıyryldy. 

Tóreshi Mýratany orta salmaqtaǵy ekinshi álem chempıony retinde jarııalaǵannan keıin, boksshy kózine jas alǵan.

"Jekpe-jektiń bulaı aıaqtalǵanyna tańǵaldym, biraq onyń yrǵaqty sezinip, aıqasty tezirek aıaqtaǵysy kelip turǵanyn túsindim. Ekeýmiz de sharshap qaldyq, sondyqtan onyń aıaqtaǵany men úshin sáttilik boldy. Men bul aıqasta jeńilmeýge tıis boldym», - dedi jeńisinen keıin masattana suhbat bergen 31 jastaǵy Mýrata.

«Biraq boks súıer qaýym orta salmaqta menen de myqty chempıon bar ekenin bilýi kerek, - dedi Mýrata jeńilip kórmegen qazaqstandyq boksshy Gennadıı Golovkındi meńzep. - Ony jeńý úshin barymdy salamyn».