Japondyq bıznesmender AEA jobalaryna qyzyǵýshylyq tanytty - Qaraǵandy
QARAǴANDY. QazAqparat - Qaraǵandyda áleýetti ınvestorlarǵa elimizdiń Arnaıy ekonomıkalyq aımaqtaryn tanystyrǵan rod-shoý ótti. Forýmǵa Japonııadan kelgen delegatsııa jáne Qazaqstandaǵy iri halyqaralyq kompanııalardyń ókilderi qatysty.
Sheteldik qonaqtar qazaqstandyq áriptesterimen jaqynyraq tanysyp, ortaq qyzyǵýshylyqtardy anyqtap baılanys ornatý maqsatynda kelgen, dep habarlaıdy óńir basshysynyń resmı saıty .
Halyqaralyq forýmdy Qaraǵandy oblysy ákimdiginiń qoldaýymen «Kazakh Invest» Ulttyq kompanııasy uıymdastyrdy.
- Biz AEA jáne ındýstrıaldy aýmaqtarǵa arnalǵan osyndaı forýmdy alǵash ret ótkizip otyrmyz. Onyń maqsaty - tájirıbe almasý jáne ınvestorlardy izdeýge kómektesý. Munda alys shet elderden kelgen qonaqtar bar, aýqymdy japondyq delegatsııa keldi, - dedi «Kazakh Invest» UK AQ basqarma tóraǵasynyń orynbasary Birjan Kaneshev. - Búgingi rod-shoý respýblıkamyzdyń AEA basqarý kompanııalary, AEA rezıdentteri, quzyrly memlekettik organdar tarapyna da, áleýetti otandyq jáne sheteldik ınvestorlar jaǵyna da tikeleı kelisim júrgizýge arnalǵan alań bolyp tabylady.
Japondyq bıznesmender seriktestik qurýǵa qyzyǵýshylyq tanytty.
- Qazaqstan - ınvestıtsııalyq áleýeti zor el. Japonııa men Qazaqstan arasynda saýda salasynda óte jaqsy qarym-qatynas ornaǵan - nátıjelilik 9 ese ósti. Alaıda ınvestıtsııalyq seriktestik sonshalyqty belsendi emes, - dep atap ótti ROTOBO Reseı jáne TMD ekonomıkasynyń ǴZI dırektory Mıkı Vadzıma. - Biz ınvestıtsııalyq seriktestik ornatý úshin basym baǵyttardy tańdap aldyq. Ol - sýmen qamtý, sýdy tazartý salasyndaǵy ekologııa men tehnologııa. Bul kezdesý qazaqstandyq áriptestermen jaqynyraq tanysýǵa, ózara tıimdi baılanys ornatýǵa múmkindik beredi.
Forýmda Qazaqstannyń AEA elektrondy ınteraktıvti kartasynyń synama túri tanystyryldy. Ol qaraǵandylyq «Saryarqa» AEA negizinde qurylǵan. Kartada qoljetimdi, bos jer telimderi, kompanııalardyń baınalys málimetteri keltirilgen. Interaktıvti baza ınvestıtsııalyq jobanyń júzege asý deńgeıin jáne ınfraqurylymdar qurylysynyń kezeńderin kórýge múmkindik beredi.
Sheteldik qonaqtarǵa Almaty, Qaraǵandy, Shymkent jáne Pavlodar qalalarynyń AEA tanystyryldy. Sonymen qatar «Saryarqa» AEA-da júzege asyrylǵan sátti jobalardyń biri - «RecyclingCompany» JShS-niń eski kólikterdi joıýmen aınalysatyn zaýyty kópshilik nazaryna usynyldy.
