Japondyq Space One kompanııasynyń Kairos zymyrany alǵash ushqan sátte jarylyp ketti

TOKIO. KAZINFORM – Japonııanyń Space One kompanııasy jasaǵan Kairos zymyrany sársenbide alǵashqy ushyrylymynan birneshe sekýndtan keıin jarylyp ketti. Fırma orbıtaǵa spýtnık shyǵarǵan alǵashqy japondyq kompanııa bolýdy kózdegen dep jazady Reuters.

Búgin, 13 naýryzda Japonııanyń batysyndaǵy Vakaıama prefektýrasyndaǵy jeke ǵarysh porty Kii ushyrý alańynda 18 metrlik Kairos zymyrany ushyrylǵannan keıin kóp uzamaı jarylǵan. Zymyrannyń synyqtary ushyrý alańynyń mańyna qulap, úlken órt shyqty.

«Zymyran ushýdy toqtatty, óıtkeni onyń mıssııasy qıyn bolatynyn ańǵardyq», – dedi kompanııa prezıdenti Masakadzý Toıoda.

Space One birinshi satydaǵy qozǵaltqysh janǵannan keıin ózin-ózi joıýǵa ne sebep bolǵanyn nemese kompanııa kelesi Kairos-ty qashan iske qosatynyn naqtylamady, tek jarylysty egjeı-tegjeıli zertteıtinin málimdedi.

Kompanııa ushyrý avtomattandyrylǵanyn, tek jerde on shaqty personal qajet bolatynyn jáne zymyran ushý jolynda jyldamdyqta nemese basqarý júıesinde adamdarǵa qaýip tóndiretin jáne apatqa ákelýi múmkin qatelerdi anyqtaǵan kezde ózdiginen joıylatynyn aıtty.

«Biz «jahandyq sátsizdik» termınin qoldanbaımyz. Óıtkeni árbir synaq bizge jańa máseleni sheshý úshin jańa derekter men tájirıbe ákeledi», - dedi Toıoda baspasóz máslıhatynda.

Vakaıama prefektýrasynyń gýbernatory Sıýheı Kıshımoto jýrnalısterge zymyran ushyrý alańynyń janynda zardap shekkender joq ekenin jáne órt sóndirilgenin málimdedi.

Kairos orbıtadaǵy barlaý spýtnıkterin sátsizdikke ushyraǵan jaǵdaıda ýaqytsha almastyra alatyn tájirıbelik úkimettik jerserigin alyp ushpaq bolǵan.