Japondyq Mitsubishi Qazaqstannan sırek kezdesetin gallıı metalyn ımporttaı bastaıdy

ASTANA. KAZINFORM — Japondyq Mitsubishi Corp. saýda kompanııasy asa mańyzdy materıaldardy jetkizý kózderin ártaraptandyrý úshin osy jyldyń sońynda Qazaqstannan sırek kezdesetin gallıı metalyn ımportyn bastaýdy josparlap otyr, dep habarlaıdy Kazinform. 

Kompanııa óziniń enshiles kompanııasy Mitsubishi Corporation RtM Japan Ltd. jeltoqsan aıynda «Qazaqstan alıýmınııi» AQ-men 2026 jyldan bastap birneshe jyl boıy jylyna orta eseppen 15 tonna gallıı satyp alý týraly kelisimge otyrǵanyn habarlady.

Kyodo aqparat agenttiginiń jazýynsha, bul Mitsubishi kompanııasy úshin gallıı ımportynyń alǵashqy jaǵdaıy bolmaq.

Qazaqstandyq kompanııa gallıı óndirisin bıylǵy jyldyń úshinshi toqsanynda bastaıdy, al óndirilgen barlyq metall Japonııaǵa jóneltiledi, dep habarlady Mitsubishi kompanııasy.

Kelisimshartqa Qazaqstan Prezıdenti Qasym-Jomart Toqaevtyń ótken jyldyń jeltoqsanda Japonııaǵa resmı sapary kezinde qol qoıyldy.

Úkimet qoldaǵan Japonııa metall jáne energetıka qaýipsizdigi jónindegi uıymynyń málimetinshe, Japonııa 2021 jyly 96,5 tonna gallıı ımporttaǵan, onyń 55 tonnasy nemese 57 paıyzy Qytaıdan kelgen.

Álemdegi eń iri gallıı óndirýshisi Qytaı 2023 jyldan beri osy metall eksportyna baqylaýdy kúsheıtti, bul Japonııa men turaqty jetkizilimderdi qamtamasyz etýge tyrysatyn basqa elder úshin qıyndyqtar týdyrdy.

Mitsubishi kompanııasynyń qoǵammen baılanys jónindegi ókili «Qytaımen ekonomıkalyq baılanysty úzýge tyrysý nıeti joq» jáne ımporttyq joba «jańa jetkizýshilerdi damytý» boıynsha kúsh-jigeriniń bir bóligi ǵana ekenin málimdedi.

Gallıı elektromobılderge qajetti qýatty jartylaı ótkizgishterde, sondaı-aq suıyq krıstaldy panelderde qoldanylatyn jaryqdıodtarda jáne basqa da kóptegen ónimderde qoldanylady.

Ony alıýmınıı óndirisiniń janama ónimi retinde alýǵa bolady.