Japondyq gımnast shylym shegip, ishimdik ishkeni úshin Parıj Olımpıadasyna qatyspaıtyn boldy

ASTANA. KAZINFORM – Japonııanyń sporttyq gımnastıka qaýymdastyǵy komanda kapıtany Seko Mııatony ishimdik iship, temeki shekkeni úshin Parıj Olımpıadasyna qatystyrmaıtyn boldy. Óıtkeni elde buǵan 20 jasqa tolmaǵan adamdarǵa qatań tyıym salynǵan. Al sportshy 19 jasta, dep habarlaıdy Kazinform Kyodonews-ke silteme jasap.   

Monakodaǵy jattyǵý bazasynan oralǵannan keıin gımnast maýsym aıynyń sońynan bastap zańsyz ishimdik pen temeki tutynǵanyn moıyndaǵan. Bul aqparat paıda bolǵan soń, Japonııanyń gımnastıka qaýymdastyǵynyń jetekshisi Tadashı Fýdzıta baspasóz máslıhatyn ótkizip, Seko Mııatonyń Parıjdegi Olımpıadasynan shyǵarylǵanyn málimdedi.

Japonııa Olımpıada komıteti bul jaǵdaı el tarıhynda alǵash ret bolǵanyn aıtyp otyr. S.Mııatonyń bolmaýy halyqaralyq jarystarda ulttyq quramanyń óner kórsetýine eleýli áser etedi. Ol ulttyq chempıonatta jeńiske jetip, Olımpıadaǵa joldama jeńip alǵan edi.

Áleýmettik jelilerde japondyqtar bul oqıǵany ekiushty baǵalady. Keıbir azamattardyń aıtýynsha, mundaı teris qylyqtan góri eldiń sport komandasynyń halyqaralyq ımıdji mańyzdy. Japonııa atynan ókildik etý múmkindiginen aıyrý – aýyr jaza, al komandada qalǵan gımnasttardyń medal jeńip alý múmkindigi az. Sondaı-aq qaýymdastyq sheshimi jas Mııatonyń sporttyq mansabyna núkte qoıýy múmkin.