Japon jáne mońǵol ǵalymdary «Táńir tańbasynyń» syryn ashty
ASTANA. QazAqparat - Qazaq halqy «qal» dep aıtatyn jańa týǵan baladaǵy kók tańbany mońǵol jáne japon ǵalymdary birige zerttep, onyń birneshe ultta ǵana kezdesetinin anyqtady, dep jazady SakhaNews AA.
Mońǵol halqy «Tengrıın tamga» (Táńir tańba) dep ataıtyn belgini Tokıoda japon antropologtary men genetıkteri erekshe tásil arqyly zerttep, birqatar ǵylymı qorytyndy usyndy. Ǵalymdardyń aıtýynsha, ol belgi kóbinese nárestede bes jasqa deıin saqtalyp, keıde 7-13 jasqa deıin bolady. Tipti, ómir boıy saqtalatyndary da bar eken, biraq ol - óte sırek kezdesetin jaǵdaı.
«Táńir tańbasy» Eýropa halyqtarynda tipti kezdespeıdi, tek Bolgarııada jańa týǵan nárestelerdiń 0,6 paıyzynda ǵana tabylyp qalady, delingen ǵylymı tujyrymda. Ol negizinen býrıat, ıakýt, qyrǵyz, qazaq, japondardyń aındary, káris, qalmaq, týva, hakas ulttarynda sonymen qatar, Soltústik Amerıkanyń úndisterinde ǵana bar eken.
