Japon kompanııasy sábiz ben almadan apelsın dámi bar shyryn shyǵardy
ASTANA. KAZINFORM — Japondyq Kagome Co. kompanııasy shıkizat baǵasynyń kúrt ósýine baılanysty apelsın qoldanbaı apelsın dámi bar shyryn shyǵardy, dep habarlaıdy Kyodo.
Japonııa boıynsha sýpermarketter men kúndelikti saýda dúkenderinde jańa ónim satylymǵa shyqty. Bul sýsyn 100% kókónis pen jemis shyrynynan turady, 195 ml-lik qaptama shamamen 140 ıenge satylady.
Kompanııanyń málimetinshe, apelsın dámin ózderiniń tehnologııasyn qoldanyp shamamen eki jyldyq zertteý nátıjesinde qalpyna keltirgen. Shyrynnyń quramynda Jańa Zelandııadan ákelingen sary sábiz, alma, sondaı-aq ananas pen lımon bar. Sábiz tabıǵı táttilikti beredi, al alma dámdi tolyqtyrady.
Kompanııa ımporttyq shıkizat baǵasynyń ósýine baılanysty apelsın jemisin qoldanbaýdy sheshken. Japonııa negizinen shetelden jetkiziletin ónimderge táýeldi, biraq negizgi óndirýshi elderdegi, sonyń ishinde Brazılııadaǵy eginniń nasharlyǵy men valıýtanyń álsireýi apelsın shyryndarynyń baǵasyn kóterip, ýaqytsha satylymnyń azaıýyna ákeldi.
Syrtqy saýda derekteri boıynsha 2025 jyly apelsın shyryndarynyń ımporttyq baǵasy lıtrine shamamen 980 ıenge jetip, 2020 jylmen salystyrǵanda tórt ese ósken.
Kagome Co. kompanııasy atap ótkendeı, sýsyndy ázirleý kezinde turaqty jetkizilip turǵan ıngredıentter qoldanyldy, bul tsıtrýs naryǵynyń qubylmalylyǵyna táýeldilikti azaıtýǵa múmkindik beredi.
Buǵan deıin Túrkistan oblysynda tabıǵı shyryn men balalar taǵamy shyǵarylatyny týraly jazdyq.
