Túrkııadaǵy qonaqúı órtinen qaza tapqandardyń týystary ádildik talap etti
ASTANA.KAZINFORM - Túrkııanyń Bolý provıntsııasyndaǵy taý shańǵysy kýrortynda ornalasqan Grand Kartal qonaqúıindegi órtten qaza tapqandardyń týystary kinálilerdiń barlyǵyn jaýapqa tartýdy talap etip, Bolýdan Ankaraǵa deıin jaıaý sherýdi bastady. Bul týraly Kazinform agenttiginiń Ankaradaǵy menshikti tilshisi habarlady.
Sherý Bolý qalasyndaǵy sot ǵımaratynyń aldynda bastaldy. Bastamashysy – órtten anasynan, baýyrynan jáne 11 jastaǵy jıeninen aıyrylǵan Oktaı Akıshlı. Sherý bastalar aldynda qaza tapqandardyń jaqyndary málimdeme jasap, qaıǵyly oqıǵaǵa qatysy bar barlyq tulǵany jaýapqa tartýǵa shaqyrdy.
Órtten segiz týysynan aıyrylǵan advokat ıÝksel Gıýltekın Túrkııanyń Memlekettik keńesi birqatar laýazymdy tulǵaǵa qatysty tergeý júrgizýge ruqsat bergenimen, apat bolǵanyna shamamen on aı ótse de, olardyń isi boıynsha sot protsesi áli bastalmaǵanyn aıtty.
Onyń sózinshe, qaza tapqandardyń týystary kinálilerdiń qyzmetine qaramastan, barlyǵy sot aldynda jaýap bergenge deıin ózderiniń qoǵamdyq naýqanyn jalǵastyra beredi. Ol bul sherýdi «ar-ojdan sherýi» dep atap, Ankaraǵa deıingi jol boıyndaǵy eldi meken turǵyndary da oǵan qosylady degen úmit bildirdi.
Oktaı Akıshlı olardyń maqsaty kek alý emes, ádildikke qol jetkizý ekenin aıtty. Onyń pikirinshe, jaýapkershiligi anyqtalǵan sheneýnikterge qatysty qylmystyq qýdalaýdyń bolmaýy sot júıesine degen senimge nuqsan keltiredi.
Sherý bastalar aldynda qatysýshylar órtten qaza tapqan 78 adamnyń rýhyna taǵzym retinde kókke áýe sharlaryn ushyryp, keıin Ankara baǵytyna jol tartty. Olarǵa jergilikti turǵyndar da qosylyp, qaza tapqandardyń otbasylaryna qoldaý bildirdi.
Eske salaıyq, buǵan deıin Túrkııada Kartalkaıa taý shańǵysy kýrortyndaǵy Grand Kartal qonaqúıinde bolǵan alapat órtke qatysty is boıynsha sot úkimi shyqqany habarlanǵan bolatyn.
Aıta ketelik birneshe týrıst ózin nashar sezingen: Túrkııadaǵy bes juldyzdy qonaq úı tekserilip jatyr.
