Japon ınvestorlary Arystaǵy zardap shekkenderge kómektespek
"Túrkistan oblysyndaǵy qaıǵyly oqıǵa týraly bárimiz de habardarmyz. 40 myńnan astam zardap shekkender búginde úıine orala almaı otyr. Japonııadaǵy atom elektr stantsııasyndaǵy apat kezinde Qazaqstan bizdiń halqymyzǵa ólsheýsiz kómek, qoldaý kórsetti. Biz ony umytqan joqpyz, sondyqtan zardap shekkenderge qolymyzdan kelgenshe kómektesýge degen nıettemiz",-dedi «Tokyo Rope Almaty» JShS-niń bas dırektory Takeıama Toshıo.
Óńir basshylyǵymen kezdesý kezinde japon ınvestorlary ekijaqty yntymaqtastyq máselelerin talqylady. Kúnshyǵys eliniń bıznes - kompanııalarynyń Atyraý óńirine qyzyǵýshylyq tanytýynyń sebebi - Qazaqstannyń munaı-gaz salasyndaǵy neǵurlym iri jobalary osynda shoǵyrlanǵan. Óńirdiń ınvestıtsııalyq múmkindikterimen tanysý úshin Atyraýǵa «Metal One Corporation», «Metal One Steel Products Corporation» jáne basqa da kompanııalardyń basshylyǵy keldi.
Álem boıynsha bolat ónimderin óńdeýmen shuǵyldanatyn 160 japondyq jáne sheteldik kompanııalarymen jumys jasaıtyn «Metal One Corporation» kompanııasy bolat dıstrıbıýtsııasy salasyndaǵy kóshbasshy bolyp tabylady.
«MetalOneSteelProductsCorporation» jalpyulttyq kólemde sym shybyqtaryn, arnaıy bolat jáne tot baspaıtyn bolat shyǵarýmen aınalysady.
Oblys ákimi Nurlan Noǵaev ınvestorlardy óńirdiń ınvestıtsııalyq múmkindikterimen tanystyryp, Elbasynyń, Prezıdenttiń el ekonomıkasyna ınvestıtsııalar tartýǵa zor mańyz berip otyrǵanyn atap ótti. 
«Biz tıimdi qarym-qatynas úshin qajetti barlyq jaǵdaıdy jasaımyz, ekijaqty yntymaqtastyqtyń áleýeti zor»,-dep atap ótti óńir basshysy.
Japondyq ınvestorlar ónim óndiretin óz zaýytyn salýdy josparlap otyr. Jumys sapary kezinde olar bolashaq qurylystyń alańshasyn qaraıdy. Sondaı-aq, ındýstrıaldyq munaı hımııasy tehnoparkiniń jumysymen tanysady.
