Japon ıenasy 40 jyldaǵy eń tómengi deńgeıge jaqyndady
ASTANA. KAZINFORM — Iena AQSh dollaryna shaqqandaǵy baǵamy boıynsha sońǵy 40 jyldaǵy eń tómengi deńgeıge jýyqtap saýdalanyp jatyr, dep habarlaıdy Kazinform agenttiginiń Vashıngtondaǵy menshikti tilshisi CNA agenttigine silteme jasap.
Bul jaǵdaı Japonııa bıliginiń valıýta naryǵyna aralasýy múmkin degen boljamdardy kúsheıtip otyr.
Qazirgi ýaqytta ıenanyń baǵamy bir AQSh dollaryna shaqqanda 161,25 ıenany qurap otyr. Bul — 2024 jyldyń shilde aıynan bergi eń tómengi kórsetkish. Eger baǵam 2024 jylǵy eń joǵary deńgeı — 161,96 ıenadan asyp ketse, onda japon valıýtasy 1986 jyldan bergi eń álsiz deńgeıine deıin quldyraıdy.
Sarapshylardyń pikirinshe, Japonııa bıligi sáýirdiń sońy men mamyrdyń basynda jasaǵandaı, valıýta naryǵyna qaıtadan aralasýy múmkin. Sol kezde el bıligi shamamen 11,7 trln ıena (72,54 mlrd AQSh dollary) kóleminde valıýtalyq ınterventsııa júrgizgen bolatyn.
Ienanyń álsireýine Irandaǵy soǵys ta áser etti. Qaqtyǵys saldarynan munaı baǵasy kúrt ósip, ınflıatsııalyq qysym kúsheıgen.
Daiwa Capital Markets kompanııasynyń Londondaǵy ekonomıkalyq zertteýler bóliminiń basshysy Krıs Skıklýnanyń aıtýynsha, ıenaǵa qunsyzdaný baǵytyndaǵy qysym aldaǵy ýaqytta da saqtalady. Sondyqtan japon bıligi ulttyq valıýtany qoldaý úshin taǵy da naryqqa aralasýǵa májbúr bolýy múmkin.
Eske sala keteıik, buǵan deıin AQSh-tyń Iranǵa qatysty munaı sanktsııalaryn ýaqytsha toqtatatyny habarlanǵan bolatyn.
