Japon ǵalymdary Aıda ottegi ıondaryn tapty
ASTANA. QazAqparat - Zertteý nátıjesi boıynsha bizdiń planetadaǵy protsester Aıǵa tikeleı áser etetinin rastaldy. Jer atmosferasynyń ottegi bólshekteri Aıda da bar, dep habarlaıdy Habar 24 telearnasy.
Ottegi bólshekteri Aıǵa 2,4 mlrd jyl buryn túsken. Bul týraly tıisti zertteý jumystaryn júrgizgen Osakı ýnıversıtetiniń mamandary habarlady. Olar málimetterdi planetamyzdyń serigin zertteý úshin 10 jyl buryn ushyrylǵan «Kagýıa» ǵylymı apparatynan taldaý jasaǵan.
Nátıjesinde olar Kún, Jer jáne Aı bir syzyqtyń boıynda bolǵan kezeńderde jer atmosferasynyń ıondary Aıǵa túsip ketýi múmkin ekendigin anyqtady.
Sondaı-aq japondyq ǵalymdar alǵash ret bul protsess 2,4 mlrd jyl buryn bastaldy dep esepteıdi. Ol kezde Jer atmosferasynyń ózgerýine jáne ondaǵy bos ottegi paıda bolýyna ákelgen ottegi apaty bolǵan. «Jerdegi otteginiń kóp bóligi fotosıntezdiń túzilýinen óndiriledi. Bizdiń zertteý bizdiń planetadaǵy protsester Aıǵa tikeleı áser etetinin rastaıdy», - dep atap ótti Osakı ýnıversıtetiniń professory Kentaro Terada.
