Japon ǵalymdary arheologııalyq jádigerlerdi zertteýge kómektesedi

TOKIO. QazAqparat - QR Tuńǵysh Prezıdenti - Elbasy Nursultan Nazarbaev Qazaqstanda arheologııalyq málimetterdi zertteý, tirkeý jáne konservatsııalaý tehnologııalaryn berý, tájirıbe almasý jobasymen tanysty, dep habarlaıdy QazAqparat tilshisi.

Jobany Nara qalasyndaǵy Mádenı qundylyqtar ulttyq zertteý ınstıtýty Jahandyq jobalaý departamentiniń bas dırektory Sındzı Kato tanystyrdy. Onyń aıtýynsha, Ulttyq qundylyqtardy zertteý ortalyǵy 1962 jyly qurylǵan. Ortalyqta shamamen 70 qyzmetker jumys isteıdi. Olar arheologııa, arhıtektýra, ádebıet tarıhy, qorshaǵan ortany qorǵaý baǵyttarynda túrli zertteýler júrgizedi.

«2018 jyly Qazaqstannyń Tuńǵysh Prezıdenti «Uly dalanyń jeti qyry» atty maqalasyn jarııalap, onda «Arhıv-2025» baǵdarlamasy jaıynda sóz qozǵaǵan sátten bastap birlesken jobany júzege asyrýǵa qyzyǵýshylyq tanyttyq. Biz osynaý aýqymdy josparǵa óz úlesimizdi qosa alatynymyzǵa senimdimiz», - dedi ol.

Onyń atap ótýinshe, joba tabylǵan artefaktilerdi bastapqy óńdeý jáne konservatsııalaý ádisteri, arheologııalyq jádigerlerdi zertteý, mádenı qundylyqtar jaıyndaǵy aqparattardy tsıfrlandyrý syndy negizgi úsh baǵytty qamtıdy.

Buǵan deıin habarlaǵanymyzdaı, Qazaqstannyń Tuńǵysh Prezıdenti - Elbasy Nursultan Nazarbaevqa Japonııanyń Mádenıet isteri jónindegi agenttiginiń elimizdiń «Arhıv-2025» baǵdarlamasyna tehnıkalyq kómek kórsetý jobasy tanystyryldy.