Japon ǵalymdary birneshe saǵat ishinde teńiz sýynda erip ketetin plastık oılap tapty

ASTANA. KAZINFORM — Japonııalyq zertteýshiler ekologııa úshin asa mańyzdy jańalyq ashty, olar birneshe saǵat ishinde teńiz sýynda erip ketetin plastık túrin ázirledi, dep habarlaıdy AZERTADJ.

Bul jańalyq álemdik muhıtty lastap, janýarlar dúnıesine qaýip tóndirip otyrǵan zamanaýı ekologııalyq máselege tıimdi sheshim bola alady.

RIKEN Jańa materıaldardy zertteý ortalyǵy men Tokıo ýnıversıtetiniń ǵalymdary jasaǵan jańa materıal teńiz sýymen árekettesken kezde eshqandaı iz qaldyrmaı tez ydyraıdy. Joba jetekshisi Takýdzo Aıda bul jańalyqtyń qaptama óndirisi salasyn qosa alǵanda, kóptegen taraptan úlken qyzyǵýshylyq týdyrǵanyn aıtty. Degenmen, ázirge bul materıaldy kommertsııalandyrý jospary jarııalanǵan joq.

BUU Qorshaǵan orta jónindegi baǵdarlamasynyń boljaýynsha, 2040 jylǵa qaraı plastık qaldyqtary úsh ese artyp, jyl saıyn muhıtqa 23–37 mıllıon tonna qoqys túsýi múmkin.

— Balalar bolashaqta qandaı planetada ómir súretinin tańdaı almaıdy. Ǵalym retinde biz olarǵa múmkindiginshe taza orta qaldyrýǵa tıispiz, — dedi Aıda.

Jańa materıal munaı negizindegi plastıkpen birdeı beriktikke ıe, alaıda tuz áserinen óziniń bastapqy komponentterine ydyraıdy. Bul komponentterdi tabıǵı bakterııalar ońaı qaıta óńdeı alady, osylaısha mıkroplastık túzilýiniń aldyn alady. Sonymen qatar, bul plastık ýly emes, janyp ketpeıdi jáne kómirqyshqyl gazyn bólmeıdi.

Aıta ketelik kelesi jyly Qazaqstan óńirlik ekologııalyq sammıt ótkizedi.