Japon delıkatesi qazaqstandyq jylqy etinen jasalady

TOKIO. QazAqparat - Qazaqstan jáne Japonııa qazaqstandyq jylqy etin japon naryǵyna shyǵarý jóninde kelissóz júrgizip jatyr. Onyń nátıjesinde jylqy etinen «basashı» dep atalatyn delıkates daıyndalatyn bolady, dep habarlaıdy «QazAqparat» HAA menshikti tilshisi.

Japondyqtardyń pikirinshe, jylqy eti sıyr etinen góri áldeqaıda paıdaly jáne onda ishek taıaqshalary kezdespeıdi. Jylqy etiniń quramynda aqýyz ben lınol qyshqyly mol, alaıda kalorııasy az. Budan ózge, jylqy eti adam ómirin uzartady. Demografııalyq zertteýler únemi jylqy etin ǵana tutynatyn Japonııanyń Nagano perfektýrasy turǵyndarynyń áldeqaıda uzaǵyraq ómir súretinin dáleldegen: ortasha ómir súrý uzaqtyǵy erler úshin -80,88, áıelder úshin - 87,18.

Jylqy etin Qazaqstannan kúnshyǵys eline jetkizýdi uıymdastyrý máseleleri 2019 jyldyń 14 maýsymy kúni QR Japonııadaǵy Elshisi Erlan Baýdarbek-Qojataev jáne Japonııanyń Densaýlyq saqtaý, eńbek jáne halyqty áleýmettik qorǵaý mınıstri Takýmı Nemoto arasynda talqylandy.

Taraptar sondaı-aq densaýlyq saqtaý salasyndaǵy ekijaqty yntymaqtastyqtyń, sonyń ishinde 2018 jyldyń 25 qazanynda Astana deklaratsııasy sheńberinde qol qoıylǵan alǵashqy medıtsınalyq-sanıtarlyq kómektiń aldaǵy perspektıvalaryn talqylady.

Aıta keteıik, QR Ulttyq ekonomıka mınıstrligi Statıstıka komıtetiniń málimetinshe, 2018 jyly Qazaqstan-Japon taýar aınalymy 2 mlrd AQSh dollaryn qurady, bul kórsetkishtiń ótken jylmen salystyrǵanda 54% -ǵa artqanyn bildiredi (1,3 mlrd dollar).

Avtor: Sadyq Ákejanov