Japyraq Epenova: Ana men bala ómirin saqtaý – bizdiń negizgi maqsatymyz
ASTANA. KAZINFORM – Búgin elordada Prezıdent Qasym-Jomart Toqaev Medıtsına qyzmetkerleri kúnine oraı densaýlyq saqtaý salasynyń qyzmetkerlerin marapattady. Olardyń arasynda Mańǵystaý oblystyq «Ana men bala» perınataldyq ortalyǵynyń basshysy Japyraq Epenova da bar. Dárigerge «Qazaqstan Respýblıkasynyń eńbek sińirgen dárigeri» qurmetti ataǵy berildi.
37 jylǵa jýyq ýaqytyn ana men bala densaýlyǵyn qorǵaý isine arnaǵan dáriger bul marapatty sala mamandaryna kórsetilgen zor qurmet dep baǵalaıtynyn jetkizdi.
– Prezıdenttiń qolynan marapat alý – ár dáriger úshin úlken mártebe. Árıne, qobaljý boldy. Onyń ústine Memleket basshysyna alǵysymdy jetkizdim. Bul marapatty uzaq jyldar boıy birge eńbek etip kele jatqan áriptesterimniń, jalpy ana men bala densaýlyǵyn qorǵaý jolynda eńbek etip júrgen medıtsına qyzmetkerleriniń jumysyna berilgen baǵa retinde qabyldaımyn, - deıdi Japyraq Keńeshanqyzy.
Mamannyń aıtýynsha, búginde perınataldyq ortalyqtar zamanaýı medıtsınalyq jabdyqtarmen tolyq qamtamasyz etilip keledi. Jyl saıyn medıtsınalyq tehnıka jańartylyp, jańa tehnologııalar engizilip jatyr.
– Búginde perınataldyq ortalyqtardaǵy medıtsınalyq jabdyqtar jyl saıyn jańartylyp otyrady. Buryn qoljetimsiz bolǵan kóptegen tehnologııa qazir kúndelikti tájirıbemizde qoldanyp júrmiz. Sonymen qatar mamandardyń kásibı damýyna da jaǵdaı jasalǵan. Dárigerler elimizdiń túrli óńirlerinde ǵana emes, sheteldik klınıkalarda da bilimin jetildirip, tájirıbe almasýǵa múmkindik alyp otyr. Munyń bári kórsetiletin medıtsınalyq kómektiń sapasyn arttyrýǵa yqpal etedi, – deıdi ol.
Sońǵy jyldary medıtsına qyzmetkerlerin áleýmettik qoldaý sharalary da kúsheıgen. Bul, onyń aıtýynsha, kadr tapshylyǵyn azaıtýǵa jáne jas mamandardy salada ustap qalýǵa múmkindik berip otyr.
– Bıyl bizdiń perınataldyq ortalyqtyń tórt dárigerine ústemaqy tólendi. Onyń ekeýi – óńirge shaqyrylǵan mamandar, al ekeýi – oqý ornyn jańadan bitirip kelgen jas dárigerler. Sonymen qatar jaqynda bizdiń ortalyqtyń balansyna eki páter berildi. Mundaı qoldaý mamandardyń jumysqa degen yntasyn arttyryp qana qoımaı, óńirge qajetti kadrlardy tartýǵa jáne olardy turaqtandyrýǵa úlken septigin tıgizedi, - deıdi ortalyq basshysy.
Japyraq Epenovanyń aıtýynsha, akýsherlik qyzmettiń negizgi maqsaty – ana men bala óliminiń aldyn alý. Sondyqtan salanyń barlyq jumysy osy mańyzdy kórsetkishterdi tómendetýge baǵyttalǵan.
Sondaı-aq ol júkti áıelderdiń densaýlyǵyn saqtaý máselesinde erte medıtsınalyq baqylaýdyń mańyzyn erekshe atap ótti.
– Áıelder júktiliktiń erte kezeńinde esepke turǵany óte mańyzdy. Bul túrli asqynýlardyń aldyn alýǵa, yqtımal aýrýlardy ýaqytyly anyqtaýǵa jáne qajetti em-sharalardy der kezinde bastaýǵa múmkindik beredi. Skrınıngtik tekserýlerden ýaqytyly ótý de ana men balanyń densaýlyǵyn qorǵaýda mańyzdy ról atqarady. Sondyqtan bolashaq analardy dárigerlerdiń baqylaýyna erterek júginýge shaqyramyn, - deıdi dáriger.
Onyń sózinshe, aldaǵy ýaqytta da perınataldyq qyzmettiń negizgi baǵyty ózgermeıdi. Basymdyq ana men bala densaýlyǵyn saqtaý, ana ólimin boldyrmaý jáne medıtsınalyq kómektiń sapasyn odan ári jetildirýge beriledi.
Aıta keteıik, búgin Prezıdent bir top medıtsına qyzmetkerine memlekettik nagradalar tapsyrǵan edi.
