Japarov jıeniniń «Marry me» rásimi úshin halyqtan keshirim surady
BІShKEK. KAZINFORM – Qyrǵyzstan prezıdenti Sadyr Japarov jıeni Lazzat Nýrkojoevany uzatý rásiminde Tótenshe jaǵdaılar mınıstrliginiń tikushaǵyn paıdalanǵany úshin keshirim surady. Bul týraly ol «Kabar» agenttigine túsinikteme berdi.
24 maýsym kúni Qyrǵyzstandaǵy Orýý-Saı shatqalynda 23 jastaǵy Lazzat Nýrkojoevanyń «Maǵan úılen» rásimi ótken. Saltanatty sharadan túsirilgen vıdeony Nýrkojoevanyń ózi Instagram paraqshasynda jarııalady. Vıdeoda qalyńdyq pen kúıeý jigittiń shatqalǵa TJM-ǵa tıesili tikushaqpen sándi bezendirilgen platformaǵa kelgenin kórýge bolady. Bul jaǵdaı áleýmettik jeli qoldanýshylarynyń synyna ushyrap, Nýrkojoevany otbasylyq baılanysyn paıdalandy dep aıyptady.
Aıta keteıik, Qyrǵyzstan TJM resmı túrde tikushaqtardy jalǵa beredi. Tikushaqty bir saǵatqa jalǵa alý quny – 185 000 som (shamamen 2 150 dollar). Prezıdent Japarov óz túsiniktemesinde tikushaqtardy jalǵa berýden kelgen qarjy bıýdjetke túsetinin, bul aqshaǵa TJM tikushaq parki jańartylatynyn basa aıtty. Bul rette ol otbasy músheleriniń aqsha shashýdan aýlaq bolýy kerektigin atap ótti.
– El basshylyǵyna jaqyn adamdar ózgelerge úlgi bolýy kerek. Men ysyrapshyldyqqa núkte qoıý kerektigin jıi qaıtalaımyn. Eń bolmasa, bolashaq kúıeý bala osylaı jasamas buryn meni qoldap, oılanýy kerek edi. Synǵa ushyramaýǵa, Prezıdentti yńǵaısyz jaǵdaıda qaldyrmaýǵa tyrysý kerek edi. Meniń oıymsha, ol muny balalyqpen jasady. Ol jaı ǵana kelip qolyn surasa da, oǵan joq demes edi, – dedi S. Japarov.
Sondaı-aq, Japarov týystaryna qatań talap qoıatynyn, olardy burynǵy qatelikterge jol bermeýge, memleket isine aralaspaýǵa únemi shaqyratynyn atap ótti.
– Men basqalardy synaıtynmyn. Endi bul jaǵdaı óz basyma keldi. Jıenim úshin halyqtan keshirim suraımyn. Ol halyqtyń pikirin tyńdaıdy. Bul jaǵdaıdan durys qorytyndy shyǵarady dep esepteımin. Onyń ústine ol jańa ómirin bastap, otbasyn qurǵysy keledi jáne onyń árbir qadamy bolashaqta parasatty bolady dep senemin, – deıdi Qyrǵyzstan prezıdenti.
