Japarov: Ólim jazasyn qaıtarý máselesi búkilhalyqtyq daýys berý arqyly sheshiledi

ASTANA. KAZINFORM —  Qyrǵyzstan Prezıdenti Sadyr Japarov áıelder men balalarǵa zorlyq-zombylyq jasap, adam óltirgenderge qatysty ólim jazasyn qaıta engizý bastamasyna túsinikteme berip, bul másele tek búkilhalyqtyq daýys berý arqyly sheshiletinin málimdedi. Bul týraly ol Kabar agenttigine bergen suhbatynda aıtty. 

— Mundaı qajettiliktiń sebepteri qoǵam úshin aıqyn. Sońǵy ýaqytta kámeletke tolmaǵandarǵa qatysty qylmys jıilep ketti, — dedi memleket basshysy.

Ol mundaı qylmystyń kóbeıýi tek Qyrǵyzstanda ǵana emes, búkil álemde baıqalyp otyrǵanyn atap ótti.

Prezıdenttiń aıtýynsha, bul máseleni qarastyrǵanda sybaılas jemqorlyq taqyrybyn aralastyrmaý kerek, sebebi basty maqsat — áıelder men balalardy qorǵaý.

— Biz mundaı sheshimdi jeke-dara qabyldamaımyz. Mindetti túrde halyqpen aqyldasamyz. Qyrǵyz Respýblıkasy Konstıtýtsııasynyń 25-babyna sáıkes, ólim jazasyna tyıym salynǵan. Sonymen qatar ár adamnyń ómir súrýge ajyramas quqyǵy bar. Adam ómirine jáne densaýlyǵyna qol suǵýǵa bolmaıdy. Bul bapta ómirden aıyrý tek zań aıasynda, memleket tarapynan bolýy múmkin ekeni anyq jazylǵan. Memleket zań sheńberinde adamnyń ómiri men densaýlyǵyn qorǵaýǵa quqyly. Qoǵam balalar men áıelderdiń ómiri men ar-namysyn qorǵaý úshin ólim jazasyn engizýdi usynyp otyr. Bul halyq talaby tek zań arqyly sheshilýi tıis. Sondyqtan «Konstıtýtsııanyń 25-babyna ózgerister engizý týraly» zań jobasy aldymen qoǵamdyq talqylaýǵa shyǵarylady, — dedi Sadyr Japarov.

Onyń aıtýynsha, odan keıin Konstıtýtsııalyq sot bul zań jobasyna qorytyndy beredi.

— Bul zań jobasy referendým arqyly qabyldanýy múmkin. Másele tek búkilhalyqtyq daýys berý jolymen sheshiledi. Eger halyqtyń basym bóligi qoldasa, onda jańadan saılanǵan Jogorký Kenesh halyqaralyq kelisimderden shyǵý týraly jáne qoldanystaǵy kodekster men zańdarǵa ózgerister engizý jóninde zańdar qabyldaýy qajet bolady, — dep túıindedi prezıdent.

Eske salaıyq, qyrkúıek aıynyń sońynda 17 jastaǵy Aısýlýý Muqashevanyń qatygezdikpen óltirilýi Qyrǵyzstanda úlken qoǵamdyq rezonans týdyrǵan edi. Bul oqıǵa qoǵamdy dúr silkindirip, ólim jazasyn engizý máselesin qaıtadan kún tártibine shyǵardy.

Prezıdent Sadyr Japarov bul isti óz baqylaýyna alyp, áıelder men balalarǵa qarsy qylmystardyń aldyn alý úshin jazany kúsheıtý bastamasyn kóterdi.