«Japar sultan. Qujattary men materıaldary» atty qujattar jınaǵy tanystyryldy

ASTANA. KAZINFORM – Oqyrman nazaryna usynylǵan arhıv qujattary men materıaldar jınaǵy qazaqtyń sońǵy hany Kenesarynyń uly Japar sultannyń tarıhı taǵdyryna arnalǵan.

Jınaqqa Japar sultannyń ómiri men orys bıligine qarsy kúresin sıpattaıtyn Qazaqstan Respýblıkasy Ortalyq memlekettik arhıvi, Reseı memlekettik áskerı-tarıhı arhıvi, Orynbor oblystyq memlkettik arhıvi, Ózbekstan Respýblıkasynyń Ulttyq arhıvi qorlarynda saqtalǵan, osy ýaqytqa deıin ǵylymı aınalymǵa engizilmegen tyń qujattar engizildi. Sonymen qatar halyq aýyz ádebıetinde, ıaǵnı M.J. Kópeevtiń qoljazba qorynda, Túrkistan jınaǵynda jarııalanǵan Beket batyr jyrynda jyrlanǵan Japardyń Beket batyrmen birge Berezov túrmesinen qashyp shyqqany týraly da málimetter bar.

Qujattar jınaǵynyń tanystyrylymyna ǵalymdar, ǵylymı keńes músheleri, arhıv, kitaphana qyzmetkerleri men oqyrmandar qatysty.

Jıynǵa arnaıy shaqyrylǵan QR UǴA akademıgi H.Ábjanov, Sh.Ýálıhanov atyndaǵy Tarıh jáne etnologııa ınstıtýty dırektorynyń ǵylymı ister jónindegi orynbasary, t.ǵ.k. Sh. Tileýbaev, Kenesarynyń Japardan taraıtyn urpaǵy M.Abdramanov, Kenesarynyń Ospannan taraıtyn urpaǵy Q.Arystanov, Maral ıshan qorynyń múshesi jáne Ǵylymı keńes músheleri, Ǵ. Dáýkeev atyndaǵy AEjBÝ-niń professory, t.ǵ.k. B.Qabdýshev pen Abaı atyndaǵy QUPÝ-niń professory S. Seıfýlmalıkovalar jınaqtyń búgingi kúnge deıin zertteýshiler nazarynan tys qalyp kelgen ózekti taqyrypqa arnalyp, mańyzdy qujattardy qamtyǵandyǵy jáne onyń bolashaq urpaqqa berer taǵlymy týraly oılarymen bólisti.

Jıyn sońynda Kenesarynyń Ospannan taraıtyn urpaǵy Qurmanǵazy Arystanov QR OMA qoryna jetken kóne úsh kitapty syıǵa tartty.