Japandaǵy jalǵyz úı: Jetisýda qos qarııa 40 jyl qum ishinde turyp keledi
TALDYQORǴAN. KAZINFORM — Elsizde ómir súrip jatqan qarııalardyń biri 80-nen, ekinshisi 70-ten asqan. Qumda qalǵan jalǵyz úı jolaýshylardyń as iship, aýqattanatyn shańyraǵyna aınalǵan.

Jetisý oblysy Qaratal aýdanyndaǵy Qańbaqty kóline qaraı ushy-qıyry joq espe qumnyń ishinde jalǵyz úı bar.
Aýdan ortalyǵynan 150 shaqyrymdaı alysta jatqan sol úıde qos qarııa ómir súredi. Kúnkórisi — azyn-aýlaq mal men aı saıyn alatyn zeınetaqysy.

Mal baǵyp, balyq aýlap kúneltken otbasy 40 jyl buryn qum ishine qonystanyp, sonda qalyp qoıǵan. Qarııalardyń 5 balasy, 16 nemeresi, 20 shóberesi bar.
— Balalarymyz jazda kólge túsýge, demalýǵa kelip turady. Osy kúnge jetkizgen qudaıǵa táýba deımiz. Shalym ekeýmiz osy jerde bir-birimizge súıeý bolyp, ómir súrip jatyrmyz. Asyl tuqymdy eshkilerimiz bar. Sonyń sútin ishiemiz. Tamaǵymyzdyń bári — tabıǵı taza ónimder. Jolaýshylarǵa gazǵa emes, daladaǵy peshke tamaq jasap, samaýrynmen shaı beremin. Kelgender qaladan kókónis, jemis-jıdek pen táttilerin ala keledi. Osy eńbektiń, qımyl-qozǵalystyń arqasynda tyń júrmiz áli, — dedi Raýshan Saǵymbaeva.

Aıdalada otyrǵan jalǵyz úı jaryqty dızeldi generatordan alady. Qumnan qudyq qazyp, tipti teledıdar kórý úshin kelýshilerdiń kómegimen bıik telemunara turǵyzyp alǵan.
— Ótken-ketkender kómektesip turady. Aqshasyn tólep, qysta kómir aldyramyz. Kóbi ákelgen jol aqysyn almaıdy. Aýyra qalsaq alys demeıdi, jedel járdem de keledi. Osy jer bizge yńǵaıly. Balalar kóshińder deıdi. Qalada tura almaımyz. Biz osy dalaǵa úırengenbiz, — deıdi Manat Saǵymbaev.

Qarııalar jastardy tabıǵatty qorǵap, aıalaýǵa shaqyrady. Eńbek pen shydamdylyqtyń shyńǵa jetkizetinin aıtqan Raýshan Saǵymbaeva tazalyqty súıedi.
— Osy jerde otyryp, aýladan bir synǵan tal, shashylǵan shóp kórsem, jınap júremin. Qazan- oshaǵymdy, ydys-aıaǵymdy, úıdiń ishi-syrtyn bárin ózim jýyp, tazalap, áktep alamyn. Oqýdy jaqsy oqydym. Aıdalada otyrǵanǵa ókinetin de kezim bolady. Biraq bizdi taǵdyr osylaı jolaýshylarǵa kómek bersin, solarǵa elsizde bir pana bolsyn dep osynda otyrǵyzyp qoıdy ǵoı, — dedi Raýshan Saǵymbaeva.

Japanda qalǵan jalǵyz úıdegi qarttardyń tileýi — eldiń amandyǵy. Qazaq jastary bilimdi, eńbekqor bolyp, ultty jańa ómirge jetelese degen armany bar.
Eske salaıyq osyǵan deıin Jetisýda 10 jastaǵy bala kúnde tańerteń ózenge túsip, shynyǵyp júrgenin jazǵanbyz.
