Japanda jalǵyz derlik qystaıtyn shopannyń bir kúni – fotoreportaj
ÓSKEMEN. KAZINFORM – Baqtybek Qalymhan Shyǵys Qazaqstan oblysy Tarbaǵataı aýdany Saryóleń aýylynda qystaqta mal baǵady. Qaqaǵan aıaz ben qarly boranda tórt túlikke bas-kóz bolyp, olardy qytymyr minezdi mezgilden aman ótkizý ońaı sharýa emes. Kazinform menshikti tilshisi Botakóz Kenjehanqyzy qystaqqa baryp, shopannyń áńgimesin tyńdap qaıtty.
- Qytaıdan elge oralǵanda 19 jasta boldym. Kele sala bala-shaǵanyń qamy úshin mal baǵa bastadym. Shynymdy aıtsam, buryn baǵyp kórmegem. Osynda úırendim. Sóıtip, mal baǵyp kele jatqanyma 20 jylǵa jýyqtap qalypty, - dep bastady áńgimesin Baqtybek Qalymhan.
Taýy da, sýy da bar Saryóleńniń tabıǵaty ózine maıdaı jaqqanyn aıtady. Dalasy jazyq, qar qalyń jatpaıdy. Qysta maldy atpen, jazda mototsıklmen jaıady. Maldan bólek, otyn jarý, ot jaǵý, qora tazalaý syndy sharýasy kóp.
- Basqa jumysqa barý jaıly oılamappyn da. Ózime unaıdy. Qysta saǵat 6-da, jazda 4-5-te turamyn. Sháıimdi iship alyp, maldy qoradan shyǵaramyn. Sodan kún bata bir-aq kelemin, - deıdi shopan.
Dalada jalǵyz júrgende oıǵa shomyp ketetinin, kóbine otbasynyń qamyn, jaqyndarynyń jaǵdaıyn oılaıtynyn jetkizdi.
- Malshy úshin eń aýyr mezgil – qys. Aıazy, qary, borany bar degendeı. Al kóktem shyqqan soń jeńildeıdi. Jaz da jaıly. Qysta aqtútek boranda qalǵan kezderim bolǵan. Mal júrmeı qoıyp, adym jer muń bolyp, ábden qınaldym. Áıteýir degende aman-esen jettik-aý. Qystyń jamany sol, borandy kúni úıden shyqqanda maldy, malmen keri qaıtqanda úıdi taba almaı sendelip ketesiń, - deıdi Baqtybek Qalymhan.
Qystaqqa qasqyr shapqanyn da kórgen. Jyrtqyshtyń aıaq astynan malǵa tıip, mazany qashyryp turatyn kezderi jıi bolmasa da, birneshe ret ushyrasqan.
- Qaıdan shyqqanyn bilmeı de qalasyń. Mal úrikkende ıt-qustyń kelgenin bilip, lezde sol jaqqa qaraı shabamyn. Maldyń arasyna kirip, qasqyrdy úrkitemin. Talqandaǵan qoıy bolsa sol jerde baýyzdaımyn, - deıdi malshy.
Sóz arasynda «malshynyń bir kúndik as-aýqaty qandaı?» dep suradyq.
- Mal baǵyp júrgennen shyǵar ózim kúnde et jeımin (kúlip). Tańerteń de, túste de, keshke de - et. Tek qasyndaǵy garnır ǵana aýysyp turady, - deıdi.
Onyń aıtýynsha, malshy bolý úshin eńbekqorlyq, shydamdylyq, tózimdilik kerek. Bul kásip ekiniń biriniń qolynan kelmeıdi.
Malshylar kóktemdi asyǵa kútetinin aıtady, sebebi jaıma-shýaq kúnder boıdy ǵana jylytyp qoımaıdy, oıdy da sergitedi.
- Kóktemde báıge, kókpar ótkizip, bir serpilip, demalyp qalamyz. Qystan aman shyqqanymyzdy toılatyp degendeı. Ózim de kókpar tartamyn. Oıyndy kórýge keletin adamnyń da qarasy qalyń bolady. Ulttyq sport qoı. Bizdegi qyzyq osy, - dep sózin aıaqtady shopan.
