JAP-tyń jatahanalardaǵy oryn tapshylyǵyna qatysty deregi rastalmady — Úkimet
ASTANA. KAZINFORM — Bıyl 7 myńǵa jýyq oryndyq 18 jataqhanany paıdalanýǵa berý josparlanyp otyr. Bul jaıynda Májilis depýtattarynyń saýalyna Premer-mınıstr Oljas Bektenovtiń jaýabynda aıtylǵan.
— Memleket basshysynyń tapsyrmasyna sáıkes 2018-2025 jyldary aralyǵynda 72 125 oryndyq 281 jataqhana salyndy (rekonstrýktsııalandy) jáne paıdalanýǵa berildi. Onyń ishinde JOO stýdentteri úshin — 51 323 oryndyq 182 jataqhana, kolledj stýdentteri úshin — 20 802 oryndyq 99 jataqhana. Jumys memlekettik jáne jeke qarjylandyrý kózderin, memlekettik-jekeshelik áriptestikti (MJÁ) tartý arqyly, onyń ishinde memlekettik tapsyrysty ornalastyrý tetigin iske asyrý arqyly júrgiziledi, — dedi Úkimet basshysy jaýabynda.
Onyń atap ótýinshe, osy jumystardyń nátıjesinde 2018 jyldan beri jataqhanalardaǵy oryn tapshylyǵy 83,6 paıyzǵa qysqardy.
— 2026 jyldyń basynda oryn tapshylyǵy 10,1 myń oryndy (joǵary oqý oryndarynda 5 176 oryn jáne kolledjderde 4,9 myń oryn) qurady. Bul rette Joǵary aýdıtorlyq palatanyń nusqamasyn pysyqtaý barysynda 33 myń oryn tapshylyǵy boıynsha derekter rastalǵan joq. 2026 jylǵa arnalǵan josparda 18 jataqhanany (JOO stýdentteri úshin 5 366 orynǵa arnalǵan 11 jataqhana jáne kolledj stýdentterine arnalǵan 1 491 oryndyq 7 jataqhana) paıdalanýǵa berý kózdelgen, — dedi Oljas Bektenov.
Buǵan deıin Májilis depýtaty Nurgúl Taý stýdentterdiń jataqhanamen qamtamasyz etý máselesin kótergen edi.
