Janjaldy bastaǵan — aýyl jastary: Erlan Nysanbaev ormanshylar men turǵyndar arasyndaǵy tóbeles jaıly

ASTANA. KAZINFORM — Ekologııa jáne tabıǵı resýrstar mınıstri Erlan Nysanbaev «Ohotzooprom» qyzmetkerleriniń aýyl jastarymen tóbelesine pikir bildirdi.

«Іstiń mán-jaıyn anyqtaıtyn tıisti organ bar. Ol — oblystaǵy polıtsııa departamenti. Meniń oıymsha, bul jerde árıne, narazylyq bildirýge bolady. Biraq basqa jolmen. Bir top jas jigit birge araq ishken, jangjal shyqqan… Búginde mınıstrlik tarapynan ókilderimizdi jiberip, aýdan ákimdiginiń, basqa da organdardyń ókilderimen birge halyqpen kezdesý ótkizdik. Árıne, ol jerde turǵan másele — balalardyń taǵdyry. Bul másele jóninde sondaǵy tıisti organdarmen baılanystamyz. Bizdiń jigitterge (Ohotzooprom qyzmetkerleri — red.) kelisimge kelińder dep aıttyq. Sol sebepten istiń aıaǵy jaqsy bolady dep oılaımyn. Biraq bul balalarǵa sabaq bolsyn», — dedi Erlan Nysanbaev Úkimet otyrysynan keıin ótken brıfıngide.

«Ohotzooprom» qyzmetkerleri sol oqıǵada zań aıasynda áreket etti dep esepteısiz be?» dep suraǵyn naqtylady jýrnalıst.

Mınıstrdiń sózinshe, tóbelesti aýyl jastary bastaǵan.

«Vıdeony qarasańyz, bizdiń ınspektorlar tarapynan eshqandaı artyq áreket bolmaǵan. Qarýǵa talasqannan keıin olar, árıne, bermeýge tyrysqan. Janjaldy bastaǵan — aýyl jastary», — dedi Erlan Nysanbaev.

Eske sala keteıik, Ulytaý oblysy Jańaarqa aýdanynyń aýmaǵynda krımınaldyq polıtsııa Qyzyljar kentiniń tórt turǵynyn ustaǵan edi.

Olar «Ohotzooprom» RKMK qyzmetkerleriniń zańdy talaptaryna baǵynbaı, olarǵa kúsh qoldanyp, qashyp ketken.

Bul janjaldyń vıdeosy áleýmettik jelide tarady. 

Olarǵa 12 jylǵa deıin bas bostandyǵynan aıyrý qaýpi tónip tur.