Janjal shyǵarǵan shymkenttik ushaqty májbúrlep qondyrdy
ASTANA. QazAqparat - Antalııa-Shymkent baǵytyndaǵy №477 reıs Aqtaý áýejaıyna qonýǵa májbúr boldy. Bul jaıly Lada.kz habarlaıdy.
Ushaqtyń qonýyna Shymkent qalasynyń H.esimdi 1981 jylǵy azamatynyń aqylǵa qonymsyz áreketi sebep bolǵan. Jolaýshy reısten túsirilip, jelilik polıtsııa bólimshesi qyzmetkerlerine tapsyryldy. Saraptama qorytyndysy onyń mas bolǵandyǵyn anyqtady. Janjal shyǵarýshyǵa qatysty QR Ákimshilik quqyq buzýshylyq kodeksiniń 434-babynda kózdelgen «Usaq buzaqylyq» boıynsha ákimshilik hattama toltyryldy.
«Araqqa toıǵan shymkenttik azamat pen janynda otyrǵan jolaýshy ekeýiniń arasynda janjal týyndaǵan. H. esimdi azamat ózin dóreki ustap, borttaǵy jolserikterge de baǵynbaı qoıǵan. Áýe kemesiniń komandıri ushaqty Aqtaý áýejaıyna toqtatýǵa sheshim qabyldady. Aqtaý ákimshilik soty azamat H-ny qamaýǵa alý týraly qaýly shyǵardy. Qazirgi ýaqytta ol ýaqytsha oqshaýlar ortalyǵyna qamaldy», - dedi Aqtaý ishki ister basqarmasy jelilik polıtsııa bólimshesiniń basshysy Serikqalı Qujıev.
