«Janyńda júr jaqsy adam» jobasy jalǵasyn tapty
ASTANA. QazAqparat - «Qazaqstan» telearnasynda «Janyńda júr jaqsy adam» derekti fılmder toptamasy jalǵasyn tapty, dep habarlady Ulttyq arnanyń baspasóz qyzmetinen.
Endi atalǵan telejobany 23 qazannan bastap, seısenbi-beısenbi kúnderi saǵat 14.00-de «Qazaqstan» ulttyq arnasynan kóre alasyzdar.
«Bul joba - elimizdiń túkpir-túkpirinde halyq arasynda erlik kórsetip, batyrlyǵy, ójettigimen kózge túsken jandarǵa arnalady. «Janyńda júr jaqsy adam» kóp serııaly derekti fılmder toptamasy kez kelgen qıyndyqqa shydap, tyǵyryqtan shyǵý, jaqsylyqqa jarshy bola bilýi jaıynda syr shertedi. «Derekti fılmder toptamasynyń maqsaty - ómirden alynǵan oqıǵalardy bir telejobaǵa arqaý etip, otansúıgishtik pen adamgershilikti jańa qyrynan nasıhattaý. Sıýjettiń prototıpteri - ómirde bar adamdar», delingen habarlamada.
