«Janym rahattanyp qaldy»: BQO-da ıtti óltirgen áıeldiń ústinen is qozǵaldy

ORAL. QazAqparat – Batys Qazaqstan oblysynda ıtti óltirdi degen kúdikti áıeldiń ústinen qylmystyq is qozǵaldy, dep habarlaıdy QazAqparat tilshisi.

Instagram áleýmettik jelisindegi pablıkterdiń birinde óltirilgen ıttiń jáne ony óltirdi dep aıyptalǵan áıeldiń fotosy jarııalandy.

Sondaı-aq sol áıeldiń aýdıojazbasy taratyldy. Onda ol budan buryn da eki ıtti óltirgenin aıtady. «Bul úshinshisi, anda taǵy basqalary júgirip júr. Janym rahattanyp qaldy. Taǵy óltirgim kelip tur, qolyma túspeı tur», - dep kúledi áıel. Ekinshi aýdıojazbada osy daýys: «Meni qylmystyq is qozǵalatyny jóninde aıtyp qorqytyp jatyr. Men tezirek otyrsam, tezirek shyǵamyn dedim», - deıdi ol.

Áleýmettik jelide atalǵan áıeldiń Terekti aýdany Shóptikól aýylynda turatyny jazylǵan.

BQO Polıtsııa departamentiniń baspasóz qyzmeti oqıǵanyń Terekti aýdanynda bolǵanyn rastady.

«Habarlama Terekti aýdany polıtsııa bóliminiń biryńǵaı tergep-tekserý tiziliminde tirkeldi. Janýarǵa qatygezdik jasaý deregi anyqtaldy. Qazirgi kezde QR QK 306-babyna sáıkes qylmystyq is qozǵalyp, tergeý amaldary júrgizilýde. Áıeldiń psıhııatrııalyq aýrýhanada esepte turatyny jónindegi derek anyqtalmady», - dep habarlady vedomstvodan.

Atalǵan bap boıynsha aıypty dep tanylǵan adam 120 aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna ne 120 saǵatqa deıingi merzimge qoǵamdyq jumystarǵa tartýǵa ne 30 táýlikke deıingi merzimge qamaqqa alýǵa jazalanady.