Jany qurban bolǵan dárigerlerge taǵzym etemiz – Talǵat Nurǵojın
ALMATY. QazAqparat – Jany qurban bolǵan dárigerlerge taǵzym etemiz. Búgin biz olardy eske alyp, vırýsqa qarsy qaıtadan kúsh biriktirý úshin jumylýymyz kerek. S.Asfendııarov atyndaǵy Qazaq Ulttyq medıtsınalyq ýnıversıtetiniń rektory Talǵat Nurǵojın osylaı málimdedi, dep habarlaıdy QazAqparat tilshisi.
«Prezıdentimiz Qasym-Jomart Toqaevtyń jarlyǵymen búgin, ıaǵnı 13 shilde - COVID-19 qaza bolǵan qazaqstandyqtardy ulttyq aza tutý kúni bop belgilendi. Búgin biz olardy eske alyp, vırýsqa qarsy qaıtadan kúsh biriktirý úshin jumylýymyz kerek. Ókinishke oraı, bul vırýs odan ári taralýyn toqtatar emes. Bireýdiń anasyn, ákesin, baýyryn jalmap jatyr. Barlyq qorǵanys sharalaryna qaramastan aq halatty abzal jandar da Covid-19 qurbany bolyp jatyr. Patsıenttiń densaýlyǵyn saqtaý jolynda óz ómirin pıda etken áriptesterime tizemdi búgip, basymdy ıemin. Olardyń kópshiligi áli de vırýspen kúreste tik tur. Olar – naǵyz batyrlar degim keledi», - dedi Talǵat Nurǵojın.
Spıker Memleket basshysynyń halyq densaýlyǵyn saqtaýda bar sharalardy jasap jatqanyn aıtty.
«Aýrhanalar men dárihanalardy dárimen qamtý jaqyn arada qalpyna keltiriledi. PTR taldaýlary da kóbeıedi. Jyljymaly zerthanalar ashylady. Naýqastarǵa qosymsha statsıonarlyq oryndar ashylady. S.Asfendııarov atyndaǵy Qazaq Ulttyq Medıtsınalyq ýnıversıtetiniń professorlyq oqytýshylyq quramy, rezıdentteri men erikti stýdentteri Covid-19 kúreske belsene qatysyp jatyr. Prezıdentimiz aıtqandaı, tek dárigerler men memlekettiń kúshi bul kúreste jetkiliksiz. Ár qazaqstandyq belsene kirisýi kerek. Mamandardyń usynysyn buljytpaı oryndaǵan jaǵdaıda ǵana biz bul indetti birge jeńemiz», - dedi T.Nurǵojın.
Aıta ketý kerek, búginde Qazaqstanda 59 899 adam koronavırýs juqtyrǵan. Onyń ishinde 34 190 adam jazylyp shyqsa, 375 adam koronavırýstan kóz jumdy.
