«Janýarlarǵa jaýapkershilikpen qaraý týraly» zań jobasy kópshiliktiń talqylaýyna shyǵaryldy
5 tamyzda, saǵat 11.00-de QR Ekologııa, geologııa jáne tabıǵı resýrstar mınıstrligi buǵan deıin QR Parlamenti Májilisiniń bir top depýtattary ázirlegen zań jobasyn qoǵamdyq talqylaýdy ótkizedi. Búgingi tańda bul qujat Úkimettiń qaraýynda.
«Qazaqstanda janýarlardy qorǵaý týraly jańa zań jobasynyń qajettiligi áldeqashan pisip-jetilgen. Elimizde barlyq janýarlarǵa, onyń ishinde úı, jabaıy jáne aýylsharýashylyǵy janýarlaryna jaýapkershilikpen qaraý týraly birde-bir zań joq. Janýarlarǵa qatygezdik kórsetken adamdar týraly áleýmettik jelide jıi jazylady. Alaıda, búginde Qazaqstandaǵy janýarlarǵa qatigezdik kórsetkeni úshin taǵaıyndalatyn jaza jeńil. Sonymen birge, tájirıbe kórsetkendeı, janýarlarǵa qatygezdikpen qaraý adamdarǵa qatysty qatygezdik qylmystan 5 ese, múlik qylmysynan 4 ese kóp», delingen mınıstrlik taratqan habarlamada.
Baspasóz qyzmetiniń habarlaýynsha, qoldanystaǵy zańnamada janýarlarǵa arnalǵan baspana uǵymy jáne olardy salý standarttary, úı janýarlaryn serýendetý jáne kútip ustaý erejeleri joq. Al qańǵybas ıtter men mysyqtardy aýlaý jáne joıý erejeleri qalalar men eldimekenderde ártúrli.
«Dalada ıtterdi atýdy kópshiliktiń synǵa alýda. Janýarlardyń quqyǵyn qorǵaýshylar onyń ornyna janýarlarǵa arnalǵan baspana quryp, mysyq men ıtti zararsyzdandyrýdy usynady. Keıbir adamdar úı janýarlaryn dalaǵa tastap, olardy uzaq ýaqyt tamaqsyz, sýsyz qaldyrady. Ýaqtyly veterınarlyq kómek kórsetpeıdi jáne t.b.
Respýblıkamyzdaǵy ótkiziletin ıtterdiń tóbelesi de etıkalyq turǵyda qaıta qaraýdy qajet etedi. Keıbir haıýanattar baǵyndaǵy jáne tsırkterdegi janýarlardy kútip-ustaý erejeleriniń qataldyǵy azamattardyń ashý-yzasyn týdyrýda», delingen habarlamada.
Jalpy, janýarlarǵa qatigezdikpen qaraý máselesi kúrdeli. Ol balalar tárbıesimen, pedagogıka, etıka, aqparattyq, qorshaǵan ortany qorǵaý jáne qylmystyq-atqarý saıasatymen tyǵyz baılanysty.
«Sondyqtan búginde memleket, birinshi kezekte, haıýanattar baǵyndaǵy janýarlardy ustaýǵa qoıylatyn talaptardy qataıtý, janýarlardy qorǵaýdaǵy azamattyq bastamalardy qarjylandyrý, sonymen birge zoologııalyq volonterlikti qoldaý jáne mektep oqýshylary men stýdentter arasynda janýarlarǵa jaýapkershilikpen qaraý ıdeıasyn ilgeriletý úshin sharalar qabyldaıdy.
Óz kezeginde, Ekologııa mınıstrligi halyqtyń osy másele boıynsha barlyq usynystaryn qaraýǵa jáne zań jobasyn talqylaý kezinde eskerýge daıyn», delingen habarlamada.
Eske sala ketsek, Memleket basshysy Qasym-Jomart Toqaev tabıǵatqa zııanyn tıgizgen zańbuzýshylarǵa salynatyn aıyppul qunyn ulǵaıtýdy tapsyrdy. Sondaı-aq Prezıdent tapsyrmasymen mektep baǵdarlamasyna «Balalardyń ekologııalyq bilimi» atty jańa pán engiziledi.
Aıta keterligi, Qazaqstanda qaraquıryqty saqtaý jobasy iske qosyldy. Kaspıı ıtbalyǵy Qazaqstannyń Qyzyl kitabyna engizilmek.
