Janýarlarǵa jaýapkershilikpen qaraý týraly zań 2 naýryzdan bastap kúshine enedi

NUR-SULTAN. QazAqparat – «Janýarlarǵa jaýapkershilikpen qaraý týraly» zań 2 naýryzdan bastap óz kúshine enedi. Bul týraly QR Ekologııa, geologııa jáne tabıǵı resýrstar vıtse-mınıstri Álııa Shalabekova aıtty, dep habarlaıdy QazAqparat.

«Memleket basshysy 2021 jyly 30 jeltoqsanda bıylǵy jyldyń 2 naýryzynan bastap kúshine enetin «Janýarlarǵa jaýapkershilikpen qaraý týraly» Zańǵa qol qoıdy. Qazirgi ýaqytta buryn-sońdy zańnamamen qamtylmaǵan quqyqtyq qatynastardy retteýdiń negizgi qaǵıdalary belgilendi. Jańa zańǵa sáıkes, azamattardy adamgershilikke tárbıeleý ıdeologııasy janýarlarǵa aýyrsynýdy sezinetin tirshilik ıeleri retinde qaraý, janýarlardyń ómiri, densaýlyǵy men ál-aýqaty úshin ıeleriniń jeke jaýapkershiligi, olardy qatygezdikten qorǵaý, halyqtyń olarǵa moraldyq jáne adamgershilik kózqarasyn tárbıeleý bolyp otyr», - dedi spıker Ortalyq kommýnıkatsııalar qyzmetinde ótken baspasóz máslıhatynda.

Atap aıtqanda, osy zań arqyly jekelegen sanattaǵy janýarlardy mádenı oıyn-saýyq, eksperımenttik, qyzmettik maqsattarda, úıdegi, qaraýsyz jáne qańǵybas janýarlardy asyraý jáne ustaý kezindegi talaptar belgilengen.

«Sondaı-aq, barlyq buqaralyq aqparat quraldarynda janýarlarǵa qatygezdikpen qaraýdy nasıhattaýǵa tyıym salynady. Zań erejelerin iske asyrý úshin qazirgi ýaqytta bizdiń mınıstrlik qoǵam talqysynan jáne quzyretti memlekettik organdarmen kelisý rásimderinen ótetin normatıvtik-quqyqtyq akt jobalaryn ázirledi», - dedi Á. Shalabekova.

Mınıstrlik ókili úı janýarlaryna asyraýdy retteýge baǵyttalǵan normatıvtik-quqyqtyq akt jobalary týraly aıtyp berdi.

Olar:

úı janýarlaryn ustaý men serýendetýdiń tıptik erejeleri;

úı janýarlaryn esepke alý erejeleri;

janýarlardy tasymaldaý erejeleri;

esepke alynatyn úı janýarlarynyń tizbesi;

turǵyn úılerde ustaýǵa tyıym salynǵan janýarlardyń tizimi;

janýar ıesiniń erekshe jaýapkershiligin qajet etetin úı janýarlarynyń tizimi.