Janýarlarǵa qatygezdik pen ekologııalyq zańbuzýshylyqtar úshin jaza qatańdatylady
ASTANA. KAZINFORM – Senat «QR keıbir zańnamalyq aktilerine janýarlar dúnıesi, orman jáne ańshylyq sharýashylyǵy jáne kásipkerlik máseleleri boıynsha ózgerister men tolyqtyrýlar engizý týraly» jáne «QR Qylmystyq kodeksi men Ákimshilik quqyqbuzýshylyq týraly kodeksine ózgerister men tolyqtyrýlar engizý týraly» zańdardy maquldady.
Atalǵan zańdar ańshylyq salasyn damytý, janýarlar dúnıesin saqtaý, sondaı-aq qylmystyq jáne ákimshilik zańnamany jetildirýdi kózdeıdi. Ásirese baqylaýdy kúsheıtýge, jaýapkershilikti arttyrýǵa jáne tabıǵı resýrstardy ornyqty paıdalanýǵa jaǵdaı jasaýǵa baǵyttalǵan birqatar zańnamalyq aktilerge ózgerister men tolyqtyrýlar engizý kózdelgen.
– Memlekettik tabıǵı qoryqtarda jabaıy ań-qustardy qoldan ósirýdi damytý tetikteri engiziledi, ańshylyq júrgizý talaptary kúsheıtilip, merzimderi naqtylanady, sondaı-aq joıylyp ketý qaýpi tóngen janýarlardy tirkeý tártibin aıqyndaý boıynsha ýákiletti organnyń quzyreti belgilenedi, – dep atap ótti Senat depýtaty Arman Óteǵulov.
Ańshylyqty retteý maqsatynda janýarlar dúnıesi nysandaryn lımıtteletin jáne lımıttelmeıtin túrlerge bólý arqyly retteý engiziledi. Janýarlar dúnıesin memlekettik qorǵaý ınspektorlaryna nysandar sanyn retteý ókilettikteri beriledi.
– Qoryqshylarǵa qoıylatyn fýnktsıonaldyq talaptar kúsheıtiledi. Sondaı-aq ańshylardyń jáne ańshylyq sharýashylyǵy sýbektileriniń respýblıkalyq qoǵamdyq birlestikter qaýymdastyqtaryna qoryqshylardy arnaıy daıarlaýdy uıymdastyrý mindeti júkteledi. Arnaıy quraldar men qyzmettik qarýdy qoldaný tártibi de retteledi, – dedi spıker.
Sonymen qatar, zańda ańshylyq sharýashylyǵyn júrgizý quqyǵynyń muragerlik tártibimen aýysý tártibi reglamentteledi.
Budan bólek, ańshylyq sharýashylyǵyn júrgizý sharttary boıynsha quqyqtardy berýge shekteý engiziledi. Bul sharalar quqyqtardy qaıta satý jáne jalǵan deldaldyqpen baılanysty josyqsyz tájirıbelerdiń aldyn alýǵa baǵyttalǵan. Atalǵan shekteýler zańdy tulǵalardy qaıta uıymdastyrý kezindegi quqyqtyq mırasqorlyq jaǵdaılaryna qoldanylmaıdy.
Al qylmystyq zańnamaǵa Prezıdenttiń janýarlarǵa qatygezdikpen qaraǵany úshin qylmystyq jáne ákimshilik jaýapkershilikti qatańdatý tapsyrmasy aıasynda normalar engiziledi. Bul shara janýarlardy qorǵaýdy kúsheıtýge, zorlyq-zombylyq qylmystarynyń aldyn alýǵa jáne qoǵamda gýmanıstik qundylyqtardy nyǵaıtýǵa baǵyttalǵan.
– Budan bólek, qorshaǵan ortany qorǵaý salasyndaǵy jaýapkershilik kúsheıtiledi. Atap aıtqanda qorshaǵan ortaǵa emıssııalardy avtomattandyrylǵan monıtorıng júıelerin ornatý jáne paıdalaný talaptaryn buzǵany úshin ákimshilik jaýapkershilik engiziledi. Qaldyqtardy basqarý salasyndaǵy ekologııalyq talaptardy buzǵany úshin ákimshilik jaýapkershilikti retteıtin normalarǵa da túzetýler engiziledi, – dedi A. Óteǵulov.
Buǵan deıin Senat sot oryndaýshylar jaýapkershiligin arttyrý týraly zańdy maquldaǵan edi.
Sondaı-aq, tsıfrlandyrý, derbes derekterdi qorǵaý, jol júrisi jáne kóliktegi ozyq tehnologııalardy retteý máseleleri boıynsha el zańnamasyna ózgerister men tolyqtyrýlar enbek.
