Janýarlardy óltirgender bes jylǵa sottalýy múmkin

ASTANA. KAZINFORM – Janýarlarǵa qatygezdik kórsetkenderge qarastyrylǵan ákimshilik jáne qylmystyq jaýapkershilik kúsheıtiledi. Bul jóninde Májilis depýtaty Edil Jańbyrshın málimdedi.

Onyń sózinshe, QR Qylmystyq kodeksiniń 316-babynda janýarlar quqyǵy qamtylǵan.

– Qoldanystaǵy zańnamaǵa saı, ań-qustarǵa zalal keltirgenderge eń úlken jaza – 30 kúnge deıin bas bostandyǵynan aıyrý. Biz qazir bul normany kúsheıtip jatyrmyz. Úkimetke joldadyq. Endi janýarlarǵa zııan keltirgender alty aıǵa deıin bas bostandyǵynan aırylýy múmkin, – dedi ol Májiliste tilshiler suraǵyna jaýap bere otyryp.

Degenmen, bul – ań-qustardy jaralaǵandarǵa qatysty norma. Al olardy óltirgenderge qarastyrylǵan jaza odan da qatań.

– QR Qylmystyq kodeksiniń qazirgi qoldanystaǵy 316-babyna sáıkes, janýarlardy óltirgender eki jylǵa deıin bas bostandyǵynan aırylady. Biz bul jazany kúsheıtip, bes jylǵa deıin uzartyp jatyrmyz. Sondaı-aq aıyptalýshynyń múlki tárkilenýi de yqtımal. Ol jaǵdaıǵa baılanysty, – dedi E. Jańbyrshın.

Sonymen birge, onyń sózinshe, ákimshilik jazany da qatańdatyp, aıyppuldy kóterý qarastyrylyp jatyr.

Aıta keteıik buǵan deıin ıtter men mysyqtardy chıpteý mindetteletinin jazǵanbyz.