«Janýarlar» áleminiń zańdylyǵymen ómir súrýden sharshaǵandar Almatyda mıtıng ótkizdi
Jeksenbi kúni «Jańa Adamdar» jastar uıymy Almatydaǵy «Sary-Arqa» kınoteatrynyń janyndaǵy saıabaqqa «janýarlar» áleminiń zańdylyǵymen ómir súrýden sharshaǵandardyń basyn qosty. Mıtıngke elde rezonans týdyrǵan zorlyq-zombylyq oqıǵalaryna qatysy bar nemese ózi sondaı jaǵdaıdyń qurbany bolǵan jandar jınaldy, dep habarlaıdy Kazinform.
Skver alańy zorlyq-zombylyq oqıǵalary týraly jazylǵan plakattarǵa, taqtashalar men art-nysandarǵa tolyp ketti. Olardyń arasynda áıelin uryp óltirgen burynǵy mınıstr Qýandyq Bıshimbaev, qyzǵanyshtan áıelin bir táýlik boıy sabaǵan Tólegen Tamabekov jáne neke túninde áıelin sabap óltirgen Serik Janalıevtiń búkil elge belgili bolǵan faktiler bar.
Sharanyń sharyqtaý shegi osy oqıǵalardyń barlyǵyn «qulyp astyna» sımvoldyq túrde ornalastyrý boldy.
Aktsııaǵa qatysýshylar óz oqıǵalaryn alańda turǵan «Joq» degen jazýy bar úlken metall torǵa «jaýyp tastady. Bul árekettiń máni – zań boıynsha ómir súrýge daıyn emes, ózderin jabaıy ańdar sııaqty ustaıtyn adamdardyń orny – osy tor ekenin meńzeý.
“Búgin alańda biz ózimizge, otbasymyzǵa jáne jaqyndarymyzǵa qatysty janýarǵa tán áreketterdi qabyldamaıtynymyzdy aıtqymyz keledi. Keıbir adamdar otbasyndaǵy jáne turmystyq zorlyq-zombylyq úshin jazany kúsheıtý máseleni sheshe alady dep esepteıdi. Biz sebep pen saldardy shatastyrmaý kerek deımiz. Jazany kúsheıtý eshqashan qylmysty joıǵan emes», - deıdi Jańa adamdar kóshbasshysy Ásel Bádenova.
Zorlyq-zombylyqqa qarsy sherýge tanymal sportshylar, blogerler men qoǵamdyq uıymdardyń ókilderi qatysty.
Burynǵy mınıstr Bıshimbaevtyń qolynan qaza tapqan Saltanat Núkenovanyń inisi Aıtbek Amangeldi jurtshylyqty zorlyq-zombylyq máselesine beı-jaı qaramaýǵa shaqyrdy.
Mıtıngiden keıin «Jańa Adamdar» halyqtyń «joq» sózin durys qabyldaı bastaýyna baǵyttalǵan azamattyq naýqandar serııasy týraly habarlady. Qozǵalys zorlyq-zombylyq taqyrybyna beı-jaı qaramaıtyndardyń barlyǵyn óz kampýsyna kelip, óz komandasyn jınap, Qazaqstanda turatyn adamdardyń oı-órisin ózgertý úshin óz jobasyn bastaýǵa shaqyrdy.
