Jantúrshigerlik jol apatynan aman qalǵan jigitti dárigerler úıine jiberdi
ALMATY. QazAqparat - Almaty dárigerleri 3 adamnyń ólimine ákelgen jol apatynan aman qalǵan jigittiń hal-jaǵdaıy týraly aıtyp berdi, dep habarlaıdy QazAqparat tilshisi.
Toyota Ipsum kóliginiń 24 jastaǵy júrgizýshisi №7 qalalyq klınıkalyq aýrýhanaǵa jetkizilgen.
«Jigittiń dene músheleriniń jumsaq tinderi jeńil jaraqattanǵan. Oǵan qajetti medıtsınalyq kómek kórsetilgen soń ambýlatorlyq emdeýge úıine jiberildi», - dedi densaýlyq saqtaý departamentiniń baspasóz qyzmetinen.
Aıta ketý kerek, jantúrshigerlik jol apatynyń mán-jaıyn qazir polıtsııa anyqtap jatyr, oqıǵa keshe túnde boldy.
Rysqulov kóshesimen ońtústikke bet alǵan Mercedes-Benz qarama qarsy kele jatqan Toyota Ipsum kóligimen soqtyǵysqan. Saldarynan Toyota Ipsum kóliginiń eki jolýshysy, Mercedes-Benz júrgizýshisi oqıǵa bolǵan jerde qaza tapty.
«Qazirgi tańda QR QK 345-babynyń 4-bólimi boıynsha sotqa deıingi tergeý jumystary bastaldy. Tergeý barysynda birqatar saraptama taǵaıyndalady», - dedi qalalyq ІІD basqarma basshysy Rýstam Abdrahmanov.
