Jantaq baly usynyldy: Elordada jármeńke qalaı ótti
«Qyzylorda oblysy jármeńkege 11 jáne 12 qyrkúıekte qatysady. Oblystan 70-ten astam aýyl sharýashylyǵy taýaryn óndirýshiler keldi. 450 tonnadan astam ónim ákelindi. Elordaǵa negizgi ónimimiz-140 tonna kúrish ákeldik. Sondaı - aq, 20 tonnadan astam et jáne basqa da kóptegen taýarlar bar», - dedi Qyzylorda oblystyq aýyl sharýashylyǵy basqarmasynyń basshysy Talǵat Beısebaev.
«Nur-Sultandaǵy jármeńkege Almaty oblysynyń 17 aýdany men 3 qalasy qatysady. 212 mln teńgeniń 462 tonna ónimi ákelindi. Barlyǵy 50-ge jýyq taýar túri bar», - dedi Almaty oblysy Aýyl sharýashylyǵy basqarmasynyń basshysy Maqsut Japarov.
Sondaı-aq, jármeńkede «Baıqońyr» ÁKK óz seriktesteriniń ónimin usyndy.
«Bizdiń erekshe ónimimiz - ol tabıǵı qaýyn chıpsylary. Bul balalarǵa berýge bolatyn óte paıdaly ónim. Sondaı-aq, biz «jantaq balyn» usyndyq. Bul jantaq shóbinen alynǵan bal. Ózderińiz biletindeı, mundaı shóp Qyzylordada ósedi. Bul bal alǵash ret osyndaı iri kólemde jármeńkede usynyldy», - dep atap ótti «Baıqońyr» ÁKK ókili Dınara Eshatova.
Aıta ketý kerek, nóser jańbyrǵa qaramastan jármeńkege júzdegen qala turǵyndary men qonaqtary keldi. Naryq baǵasynan tómen taýarlar-bul astanalyqtar úshin óz qorlaryn tolyqtyrýǵa jáne túrli oblystyń azyq-túlik dámin tatýǵa tamasha múmkindik.
«Osyndaı jármeńkelerdi ótkizip turatyny óte jaqsy. Kirý jáne shyǵý kezinde adamdar aǵyny baqylanady jáne sanıtarlyq normalardyń saqtalýyn qadaǵalap otyrady. Pandemııaǵa qaramastan, búgin otbasymyzben birge qajetti azyq - túlik satyp aldyq», - dedi elorda turǵyny Balqadısha.
«Men elordada kópten beri turamyn. Búgin týǵan ólkemnen kelgen ónimdi kórip, tanystarymdy kezdestirip qýanyp turmyn», - dep bólisti elorda turǵyny Arman.
Esterińizge sala keteıik, Nur-Sultandaǵy apta saıynǵy jármeńke 31 qazanǵa deıin jalǵasady.
