Janseıit Túımebaev: Jergilikti ákimderdiń jumysy balalardyń jaǵdaıymen baǵalanady
TÚRKІSTAN.QazAqparat - Aýdan-qala ákimderiniń jumysy endi jergilikti balalardyń jaǵdaıyna qaraı baǵalanady. Baǵalaý shkalasy bala men jasóspirimder máseleleriniń qanshalyqty sheshimin tabýyna baılanysty bolmaq. Mundaı sheshimdi aımaq basshysy Janseıit Túımebaev halyq aldynda esep berý jıyny kezinde aıtty, dep habarlaıdy QazAqparat tilshisi.
Óńir basshysynyń sózinshe, balalarǵa qatysty oblysta tirkelgen zańbuzýshylyq oqıǵalar alańdatýshylyq týdyrǵan.
«Balalarǵa qorǵaý emes, qoldaý kerek. Al dál qazir biz olardy qorǵaýǵa májbúrmiz. Olarǵa qoldaý kórsetýi tıis eresekterden qorǵaýǵa májbúrmiz. Bıyl óńirimizde bala quqyǵyn qorǵaý máselesine erekshe nazar aýdaryp, osy maqsatta «Bala quqyǵy - meniń quqyǵym» atty bastamany búkil oblys kóleminde qolǵa almaqpyz. Bul bastamany mektep, ata-ana, qoǵamdyq uıymdar, quqyq qorǵaý organdary, zııaly qaýym, qoǵam belsendileri men bıznes jáne BAQ ókilderin tarta otyryp júzege asyratyn bolamyz. Bastamanyń basty maqsaty - mektep jasyndaǵy balalardyń máselelerine qoǵam nazaryn aýdarý jáne bala quqyqtarynyń buzylýyna tózbeýshilikti qalyptastyrý bolmaq»,- dedi aımaq basshysy.
Sondaı-aq, Janseıit Túımebaevtyń sózinshe bıyldan bastap aýdan ákimderiniń jumysyn baǵalaýda bala ólimi, bala-baqshamen qamtylǵan bala sany, úsh aýysymdaǵy mektepter, kámeletke tolmaǵandarǵa qarsy jasalǵan qylmys kórsetkishi, sport úıirmelerine qatysatyn bala úlesi eskeriledi.
«Bul aýdan ákimderi ózderine senip tapsyrylǵan aımaqta qanshalyqty deńgeıde balalardyń quqyqtary taptalmaı, jan-jaqty damýyna jaǵdaı jasaı alýda degen suraqqa sandyq kórsetkishpen jaýap beredi. Sondaı-aq, bala tárbıesinde ata-ana róliniń mańyzyn men aıtpasam da, jaqsy bilesizder. Arnaıy zertteýlerge súıensek, sońǵy jyldary óńirimizde, ókinishike qaraı, óz balalaryna durys tárbıe bere almaıtyn, ata-analyq rólin tolyq atqarýǵa dármensiz otbasylar sany ósimi baıqalǵan. Máselen, 2015 jyly qolaısyz otbasy sany búkil oblys boıynsha 9 ǵana bolsa, 2017 jyly olardyń sany úsh esege artyp, 25-ke jetken. Zertteýde oılandyratyn taǵy bir málimet bar. Oblysymyzdaǵy búkil ata-ananyń jartysyn ǵana balasynyń ınternetti ne izdep, ne oqyp, ne qaraıtyny qyzyqtyrady eken. Bul balalardyń saýalnamaǵa arqyly bergen jaýaby»,- dedi Janseıit Túımebaev.
