Janseıit Túımebaev jastardyń tyń ıdeıalaryna qoldaý bildirdi
Erkin formatta ótken jıynda túrli salada eńbek etip júrgen óńir jastary óz jobalary men jumystary týraly baıandap, oblys ákimine talap-tilekteri men usynystaryn da jetkize bildi. Máselen, Aqerke Álipova atty jas kásipker qalanyń ortalyǵynan ulttyq sýsyndar men taǵamdar usynatyn úlken dámhana ashyp, óz kásibin keńeıtkisi keletinin aıtty. Al, Azııa oıyndarynyń chempıony Dıdar Hamza Túrkistan jastaryna zamanaýı sport ǵımarattary qajet ekenine toqtaldy. Ózge de jastar pikirlerin ortaǵa salyp, usynystaryn jetkizdi. Árbir jastyń sózin muqııat tyńdaǵan oblys ákimi Janseıit Túımebaev osy jıyndaǵy usynystar túgel hattamaǵa engizilip, arnaıy jumys júrgiziletinin atap ótti.
«Elbasymyz «Táýelsizdiktiń urpaqtary» atty jastar forýmynda jastardy qoldaý baǵytynda naqty mindetter júktedi. Osyǵan oraı, Túrkistan oblysynda da birqatar jumystar qolǵa alynyp jatyr. Bıyl «Jastardy turǵyn úımen qamtý» jobasy aıasynda túrli kózderden 260 jas úımen qamtylady. Jalpy jastardy baspanamen qamtý isi jandanady. Jyl saıyn oblysta 4 myńdaı oqýshy joǵary nemese arnaýly oqý ornyna túse almaıdy eken. Olardyń arasynda kópbalaly otbasydan shyqqandar kóp. Sol jastar úshin biz "Mobıldi oqý ortalyqtary" jobasyn qolǵa alyp, 4000 balany eńbek naryǵynda suranys joǵary mamandyqtarǵa daıyndaımyz. Búgingi ashylǵan jastar ortalyǵy jastar úshin qyzmet etetindikten munda bıýrokratııa emes, demokratııa bolsyn. Osy ortalyqta jastar úshin elge tanymal azamattarmen «Rýhanı jańǵyrý dáristeri» taqyrybynda kezdesýler turaqty ótkizilgeni jón. Túrkistanda sport keshenderi de, sáýletti ǵımarattar da salynady. Bunyń bári jastar úshin jasalyp otyrǵan múmkindik», - dedi Janseıit Túımebaev.
Jıynda QR qoǵamdyq damý vıtse-mınıstri Juldyz Omarbekova da quttyqtaý sóz sóılep, Túrkistan jastarynyń eńbekqorlyǵy men belsendiligin joǵary baǵalady.
Aıta keteıik, aǵymdaǵy jyly óńirde 100 gıdti arnaıy oqý kýrsynan ótip, jumysqa ornalastyrý josparlanǵan. Sondaı-aq, «Jastardyń týrıstik qaýymdastyǵy» qurylady. Elbasy qoldaýymen Túrkistanda salynyp jatqan ǵımarattardyń qurylysyna óńirdiń 3000 jas óreni jumysqa tartylyp, 1300 jas «Jasyl el» baǵdarlamasy arqyly jumyspen qamtylady. Jas kásipkerlerge 4 paıyzben 2 mln teńgege deıin nesıe beriledi. «Jastar praktıkasy» baǵdarlamasy aıasynda 5500-ge jýyq jasqa qoldaý bildirý úshin 2 mlrd teńge bólinbek.
