Janseıit Túımebaev túrkistandyqtardy qoljetimdi baspanamen qamtamasyz etýdi tapsyrdy

TÚRKІSTAN. QazAqparat - Túrkistan oblysynyń ákimi Janseıit Túımebaev «Turǵyn úı qurylys jınaq banki» AQ-nyń Ońtústik fılıaly dırektory Qudaıbergen Seıtmambetovpen kezdesti. Taraptar «Nurly jer» memlekettik turǵyn úı baǵdarlamasynyń baǵyttaryn sóz etip, kredıttik turǵyn úı qurylysyn damytý máselelerin talqylady, dep habarlaıdy QazAqparat tilshisi.

Kezdesý barysynda qoljetimdi baspana máselesin sheshý jaǵdaılary sóz boldy. Atalǵan banktiń óńirlik jetekshisi saladaǵy atqarylǵan birqatar jumystardyń barysyn baıandap, aldaǵy josparlarymen bólisti. Búgingi tańda «Turǵyn úı qurylys jınaq banki» AQ-nyń Ońtústik fılıaly «Baspana» mekemesimen qol qoıý sharalaryn júrgizýde. Aǵymdaǵy jyldyń 1-shi jeltoqsanynan bastap bank ujymy «7-20-25» baǵdarlamasy boıynsha tıisti jumystardy iske asyra bastaıdy.

Sonymen birge, basqosýda Qudaıbergen Seıtmambetov ákimge oblys turǵyndary úshin óte tıimdi de, yńǵaıly bolatyn usynysyn jetkizdi. Alǵashqy salymsyz-aq, baspanaly bolýǵa bolatyn jobada qarapaıym halyqtyń jaǵdaıy eskerilgen. Munan bólek, bank ókilderi ákimdik tarapynan turǵyn úı qurylys jınaq júıesi boıynsha túsindirý jumystaryn júrgizýde qoldaý kórsetýdi surady.

Osynaý usynys, tilekterge qanyqqan aımaq basshysy, eń bastysy, baspanalardyń qoljetimdi bolýy qajettigin atap ótti. «7-20-25» baǵdarlamasyn óńirde myqtap qolǵa alý úshin túsindirme jumystaryn keńinen júrgizýdi tıisti basqarma basshylaryna tapsyrdy.

Aıta keteıik, aǵymdaǵy jyly «7-20-25» baǵdarlamasyn oblysta iske asyrý maqsatynda Túrkistan qalasynda qurylys kompanııasy «Túrkistan» ÁKK» AQ-y arqyly 6 kópqabatty turǵyn úıdiń (288 páter, 15,6 myń sh.m.) qurylysyn bastaǵan bolatyn. Bul páterlerdi 2019 jyly paıdalanýǵa tapsyrý josparlanyp, barlyq úılerdi «7-20-25» baǵdarlama arqyly taratý kózdelýde. «7-20-25» baǵdarlamasy arqyly salynǵan turǵyn úılerdi taratý oblystyń Energetıka, turǵyn úı-kommýnaldyq sharýashylyq basqarmasy arqyly júrgiziledi. Sonymen qatar, «Turǵyn úı qurylys jınaq banki» AQ basshylyǵynyń málimetine sáıkes 2019 jyly oblys ortalyǵy - Túrkistan qalasynda banktiń oblystyq fılıaly ashylatyn bolady.