Janseıit Túımebaev: Túrkistan men Shymkent bir-birin qoldap, qatarlasa damıdy
ASTANA. QazAqparat - Túrkistan qalasynda Túrkistan oblysy men Shymkent qalasy əkimdikteriniń arasynda memorandým jasaldy. Memorandýmǵa qol qoıǵan Túrkistan oblysynyń əkimi Janseıit Túımebaev Túrkistan oblysy men Shymkent qalasy bir-birin qoldap, birge damıtynyn aıtty, dep habarlaıdy óńirlik ákimdiktiń baspasóz qyzmeti.
"Ózderińiz biletindeı, bıyl Shymkent qalasy respýblıkalyq mańyzǵa ıe megapolıske aınaldy. Al, 19 maýsymda Elbasy Jarlyǵymen Túrkistan oblysy qurylyp, Túrkistan qalasy oblys ortalyǵy bolyp bekitildi. Búgin respýblıkalyq statýsqa ıe Shymkent qalasynyń əkimi Ǵabıdolla Rahmatollaulymen birlesken yntymaqtastyq týraly kelisimge qol qoıyp otyrmyz. Elbasy 1 qyrkúıekte ótken Qazaqstan Respýblıkasy Parlamenti palatalarynyń birlesken otyrysynda Túrkistan men Shymkentti damytý məselesine erekshe toqtalyp ótti. Qyrǵyzstanda ótken Túrki memleketteri basshylarynyń keńesinde de Túrkistannyń mańyzdylyǵyna mán berdi. Shymkent - Túrkistan oblysyna eń jaqyn qala. Sondyqtan óńirdiń damýyna eń birinshi kezekte Shymkent qalasynyń qosar úlesi zor. Biz bir-birimizdi qoldaı otyryp, oblys pen qalany, sol arqyly respýblıkamyzdy damyta berýimiz kerek", - dedi Janseıit Qanseıituly.
Óz kezeginde Shymkent qalasynyń əkimi Ǵabıdolla Əbdirahymov: "Túrkistannyń Qazaqstan úshin, jalpy Túrki əlemi úshin mańyzy zor. Shymkent qalasy men Túrkistan oblysy arasynda əkimshilik shekara bar shyǵar, biraq, biz ərqashan birgemiz. Eldi eshkim bóle almaıdy. Janseıit Qanseıituly, Bas jospar bekitilgen soń Túrkistan qalasyndaǵy eń birinshi ǵımaratty Shymkent qalasy əkimdigi salyp bersin. Shymkent qalasy ərqashan Túrikistanmen birgemiz. Elbasy tapsyrǵandaı, Túrkistan qalasy erterek damyp, əlemdik deńgeıdegi shaharlardyń qataryna qosyla bersin. Ózińizge jəne sizben birge kóship kelgen basshylarǵa, memlekettik qyzmetshilerge tabys tileımin", dedi.
Memorandýmnyń maqsattary men mindetteri aýqymdy. Atap aıtsaq, əleýmettik-ekonomıkalyq jəne kásipkerlik salasynda, ınfraqurylymdy damytý, ǵylym men mədenıet salasynda jəne basqa da məseleler boıynsha əkimshilik-aýmaqtyq qurylymdar arasynda tyǵyz baılanys pen əriptestik ornatý kózdelip otyr. Memorandým aıasynda ónerkásip, shaǵyn jəne orta bıznes, densaýlyq saqtaý, mədenıet, qurylys, tsıfrlandyrý, kásibı apparat jasaqtaý, turǵyn úı-kommýnaldyq jəne ózge de salalar boıynsha əriptestik ornatylady. Osy arqyly oblys pen qala birge órkendep, jańa belesteri baǵyndyrmaq.
