Janseıit Túımebaev: Tragedııanyń aýqymdylyǵy talaı zertteýge negiz bolady
«Qazaqstanda táýelsizdik alǵaly beri tarıhty túgendeý, umytpaý baǵytynda birshama is tyndyrylyp keledi. 2004 jyly «Mádenı mura» baǵdarlamasy qolǵa alynyp, onyń sheńberinde Qazaqstan aýmaǵynda tarıhı-mádenı eskertkishter qalpyna keltirilgen bolatyn. 2015 jyly biz «Halyq tarıh tolqynynda» baǵdarlamasyn qabyldadyq. Sonyń arqasynda álemdik jetekshi arhıvterdiń qujattaryn zertteý múmkindigi týdy. Bul tragedııanyń aýqymdy bolǵany sonshalyq, alda áli talaı zertteý jumystary kútip tur», - dedi Janseıit Túımebaev Saıası qýǵyn-súrgin men asharshylyq qurbandaryn eske alý kúnine arnalǵan QHA-nyń «Tarıhtan taǵylym - ótkenge taǵzym» halyqaralyq H forýmynda.
Onyń aıtýynsha, qazirgi tańda «Rýhanı jańǵyrý» baǵdarlamasynyń ekinshi kezeńi - «Uly dalanyń jeti qyry» maqalasyndaǵy bastamalar iske asyrylýda.
«Elbasynyń «Uly dalanyń jeti qyry» maqalasynyń bazasy boıynsha biz qoǵamdyq sanany jańǵyrtýda úlken jumystardy qolǵa aldyq. Bolashaq úshin ótkendi taný - táýelsiz Qazaqstan halqynyń tarıhı sanasyn qalyptastyrýdyń negizi ekeni anyq», - dedi ol.
Aıta ketsek, atalmysh forýmda Aqparat jáne qoǵamdyq damý mınıstri Dáýren Abaev sóz sóılep, stalındik repressııanyń qurbandary boıynsha ortaq aza - qazaqstandyqtardy biriktiretin faktorǵa aınalýy tıis» ekenin málim etken bolatyn.
